Agar Pakistan mein khawateen ke job karne ki baat ki jaye to
khawateen is waqt taqreeban har field mein kaam kar rahi hain. Magar kuch aisi
jobs bhi hain jo khawateen ke liye “Dream Job” ka darja rakhti hain.
In mein se ek hai bank ki job. Bohat si larkiyan bank mein
job karne ki khawahish rakhti hain. Is mazmoon ka maqsid un khawateen ya
larkiyon ki rehnumai karna hai jo bank mein job karne ki khawahish rakhti hain.
Is mazmoon mein buniyadi tor par hum aap ko batane ja rahe
hain ke bank ki job hasil karne ke liye aap ko konsi requirements ka saamna
karna parta hai ya aap ke paas kya qualification honi chahiye. Is ke sath sath
hum aap ko yeh bhi batayenge ke Academic Certificates ke sath sath aap ko konsa
diploma ya course karna chahiye jis ki is silsile mein aap ko zaroorat pare gi.
Bank Ki Job Kya Hoti Hai?
Bank ki job ka matlab sirf cash lena ya dena nahin hota. Yeh ek
bohat zimmadari wala kaam hota hai. Bank mein aap logon ke paison ki hifazat
karte/karti hain aur unhein mukhtalif mali (financial) sahuliyat faraham karte/karti
hain.
Bank mein bank teller se lekar manager tak mukhtalif roles
hote hain. Jesa ke:
- Customer Dealing
- Accounts Manage Karna
- Loans Process Karna
- Rozana Ke Hisaab Kitaab Ko Sahi Rakhna Waghera
Bank ki job ek pur-waqar aur seekhne wali job hoti hai jo
career banane ke liye behtareen samjhi jati hai.
Bank Ki Job Ke Liye Basic Qualification Kya Hoti Hai?
Agar bank ki job ke liye taleem ki baat ki jaye to yeh doosri
aam taleem se mukhtalif hoti hai. Bank ka sara kaam buniyadi tor par
“Accounting” ke gird ghoomta hai. Is liye bank mein kaam karne ke liye aap ko
aisi taleem ki zaroorat hoti hai jis mein aap ko Accounting parhai gai ho.
Humaray mulk ka taleemi nizam buniyadi tor par 3 bare groups
mein taqseem kiya gaya hai.
- Science
- Arts
- Commerce
In teeno mein se sirf commerce ek aisa group hai jis mein
Accounting ko ek lazmi subject ke tor par shamil kiya gaya hai. Matlab agar aap
commerce ka group join karti hain to aap ko Accounting ka subject parhna hi
pare ga.
Is se sabit hota hai ke agar aap ko Banking ki field mein
apna career banana hai to aap ke paas commerce ki taleem honi chahiye. Commerce
ki taleem ka asal mein maqsad hi students ko Banking, Business aur Finance ki taleem
dena hai. Commerce mein Accounting ke sath sath aap ko Math, Stat, Economics
aur Computer Application jese subjects bhi parhaye jate hain.
Commerce ki taleem matric ke baad shuru hoti hai. Is ki
tarteeb is tarah se hoti hai.
1. I.Com / D.Com (Intermediate)
2. B.Com (Graduation)
3. MBA, M.Com (Master Level)
Agar aap banking ki field mein apna career banana chahti hain
to aap ke paas commerce ki taleem ka hona zaroori hai. Is ke baghair bhi aap ko
bank mein job mil sakti hai. Kyunki kuch aisi seats hoti hain jin par kaam
karne ke liye commerce ki taleem zaroori nahin hoti. Lekin commerce ki taleem
ke baghair aap banking ki field mein taraqi nahin kar saktin.
Is liye agar aap bank mein job karna chahti hain ya banking
ki field mein apna career banana chahti hain to aap ki qualification commerce
ki taleem par mushtamil honi chahiye.
Bank Ki Job Ke Liye Minimum Qualification Kya Hoti Hai?
Bank ki job ke liye minimum qualification aam tor par
graduation hai. Pakistan ke zyada tar banks mein apply karne ke liye kam-az-kam
14 saal ki taleem (Bachelor’s degree) ka hona zaroori hai.
Intermediate (FA / FSc / I.Com / D.Com)
Aaj ke dor mein sirf intermediate ke baad bank mein direct
job milna bohat mushkil hai. Kuch choti positions ke liye job mil sakti hai,
lekin permanent aur achi job ke liye yeh taleem kaafi nahin.
Graduation
Yeh bank job ke liye minimum required qualification samjhi
jati hai. Zyada tar banks cash officer, teller ya junior officer ke liye
graduation demand karte hain.
Commerce Background
Agar aap ne commerce ya business related field mein taleem
hasil ki ho to aap ke liye chances zyada barh jate hain. Matlab aap ne agar
intermediate mein I.Com ya D.Com aur phir graduation mein B.Com ya BBA kiya ho
to bank mein job milne ke chances barh jate hain. Kyunki, jese ke aap ko pehle
bhi bataya hai, banking ka kaam accounting aur finance ke gird ghoomta hai. Is
liye bank ki job ke liye commerce ki taleem ko tarjeeh di jati hai.
Master Degree (MBA / M.Com)
Master degree bank ki job ke liye minimum requirement nahin
hai. Lekin agar aap ke paas master degree ho to aap ko higher positions aur
promotion ke zyada chances milte hain. Is liye master degree bank ki job ke
liye zaroori nahin lekin agar ho to behtar hai.
Doosri Zaroori Skills
Bank mein job karne ke liye sirf degree ka hona hi kaafi nahin
hota. Bank ki job ke liye kuch skills ka hona bhi zaroori hota hai.
- Computer ka basic knowledge hona chahiye.
- Achi communication skills ka hona zaroori hai.
- Thori bohat English ki samajh honi chahiye.
- Aap mein confidence hona chahiye.
Natija
Agar saada alfaz mein baat ki jaye to bank ki job ke liye
minimum qualification graduation (14 years education) hoti hai. Lekin agar aap ne
pehle I.Com ya D.Com aur phir B.Com kiya ho to job milne ke chances barh jate
hain. Is ke sath sath aap ko computer ka basic knowledge bhi hona chahiye.
Matric Ke Baad Larkiyon Ko Konsa Course Karna Chahiye? | 10 Short Courses
0 Comments