FA ka matlab hota hai “Faculty of Arts”. Yeh matric ke baad 2
saal ka program hota hai. FA mein 4 lazmi (compulsory) subjects hote hain aur 3
ikhtiyari (optional) subjects hote hain.
Kya FA Private Ki Ja Sakti Hai?
Ji haan, FA private ki ja sakti hai. Aisi tamam larkiyan jin
ke liye kisi wajah se matric ke baad college jana mumkin nahin, wo ghar baithe
private FA ka imtihan (exam) de sakti hain.
Private Aur Regular FA Karne Mein Kya Farq Hota Hai?
Agar aap kisi college mein admission leti hain, rozana
college jati hain, classes attend karti hain aur aakhir mein college ki taraf
se FA ke imtihan mein shirkat karti hain, to is ko Regular FA karna kehte hain.
Lekin agar aap college jane ki bajaye ghar par hi FA ki
tayari karti hain aur khud hi dakhla bhajwa kar FA ka imtihan deti hain, to is
ko Private FA karna kehte hain.
Step-by-Step Private FA Karne Ka Tarika
Private FA karna bohat hi aasan hai. Hum aap ko neeche step-by-step
private FA karne ka tarika batane ja rahe hain.
1. Subjects Ka Intikhab Karna
FA mein 4 lazmi subjects hote hain aur 3 ikhtiyari subjects
hote hain. Lazmi subjects yeh hain:
- English
- Urdu
- Islamiyat (1st Year)
- Pakistan Studies (2nd Year)
Ikhtiyari subjects 3 hote hain. Yeh 3 subjects aap ne khud
choose karne hain. Neeche FA mein rakhe jane wale chand ahm aur mashhoor
subjects ki fehrist di ja rahi hai. Aap in subjects mein se koi se 3 subjects
choose kar sakti hain.
- Economics
- Education
- Civics
- History
- Geography
- Punjabi
- Arabic
- Home Economics
Aise subjects ka intikhab karein jin ko aap aasani se samajh
saken aur jin ki tayari ghar par reh kar ki ja sake.
2. FA Ke Imtihan Ki Tayari Karna
Subjects ka intikhab karne ke baad, doosra kaam hai imtihan
ki tayari karna. Aap ne subjects ko parhna shuru kar dena hai. Agar aap ko koi
subject mushkil lagta hai to aap us ki tuition bhi le sakti hain.
Is ke ilawa, aap tayari ke doran un logo se rehnumai bhi le
sakti hain jinhon ne FA paas ki hui ho. Bazaar se mukhtalif subjects ke notes
bhi mil jate hain. Aap tayari karne ke liye un ko bhi study kar sakti hain.
3. FA Ka Dakhla Bhijwana
Yeh sab se zaroori kaam hota hai. Aap private FA kar rahi
hain, is liye aap ne apna FA ka dakhla khud bhejna ya bhijwana hai. Dakhla
imtihan se taqreeban 3 ya 4 maah pehle bhijwana hota hai. Dakhla bhijwane ka
waqt aur fees waghera ka elaan board ki taraf se kiya jata hai.
Dakhla bhijwane ka kaam bohat si kitaabon ki dukanon par bhi
kiya jata hai. Is ke ilawa, kuch aise log bhi bazaar mein baithe hote hain jo
sirf dakhla bhijwane ka kaam karte hain. Aap in ke zariye bhi dakhla bhijwa
sakti hain.
Lekin agar aap apna dakhla khud bhejna chahti hain to neeche
diye gaye steps par amal karein.
4. Board Ka Intikhab Karna
Private FA karne ke liye aap ko kisi educational board ke
zariye dakhla bhejna hota hai. Pakistan mein mukhtalif educational boards
mojood hain. Jaise:
- Lahore Board
- Gujranwala Board
- Faisalabad Board
- Multan Board
- Rawalpindi Board
- Sargodha Board
- Bahawalpur Board
Aap jis ilaqe mein rehti hain, aam tor par usi board ke
zariye private FA ka dakhla bheja jata hai.
5. Dakhla Form Bharna
Jab Educational Board ki taraf se FA ka dakhla bhejne ke schedule
ka elaan ho jaye, to aap ne sab se pehle “Dakhla Form” bharna hai. Yeh form aap
ko kitaabon ki dukan se bhi mil jaye ga aur board ki official website par bhi mil
jaye ga.
Form bharte waqt:
- Apna naam aur tamam maloomat bilkul sahi likhni hai.
- Apne subjects dhyan se select karein.
- Recent photographs lagayen.
- Matric ke result card aur B-Form ya ID card ki copy bhi sath attach karein.
6. Fees Jama Karwana
Dakhla form bharne ke baad “Dakhla Fees” jama karwani hoti
hai. Har board ki fees mukhtalif ho sakti hai. Yeh fees aap ne bank mein jama
karwani hoti hai. Fees bank mein jama karwane ke baad, bank ki taraf se di gayi
fees ke Challan ki copy “Dakhla Form” ke sath attach karni hoti hai.
Note: Fees ke challan form ki ek duplicate copy apne paas
rakh lein.
7. Dakhla Form Attest Karwana
“Dakhla Form” mukammal karne ke baad is ko kisi aise sarkari
teacher ya officer se attest karwana hota hai jis ka job scale 16 ya is se
zyada ho.
8. Dakhla Form Ko Board Ke Daftar Bhijwana
“Dakhla Form” attest ho jane ke baad mukammal ho jata hai. Ab
aap ne is ko board ke daftar mein bhijwa dena hai. Yeh kaam TCS ki dukanon ya
kitaabon ki dukanon ke zariye ho jata hai. Form bhijwane ke baad aap ka FA ka
dakhla bhijwaya ja chukka hai.
9. Roll Number Slip Kab Jari Hoti Hai?
Imtihan se kuch din pehle board ki taraf se roll number slip
jari ki jati hai. Is slip par aap ke exam center aur tamam papers ki tafseel
likhi hoti hai. Aap ne “Dakhla Form” par apne ghar ka address likha hota hai,
is liye “Roll Number Slip” post office ke zariye aap ke ghar bhijwa di jati
hai.
Kya Private FA Ki Degree Ki Ahmiyat Hoti Hai?
Ji haan, private FA ki degree ki utni hi ahmiyat hoti hai
jitni regular FA ki degree ki hoti hai.
Natija
Private FA un larkiyon ke liye ek bohat acha option hai jin
ke liye kisi wajah se regular college jana mumkin nahin hai. FA private ki ho
ya regular, value ek jesi hi hoti hai. Is liye agar regular college jana mumkin
nahin hai to private FA karen lekin taleem ko jari rakhen.
Matric Ke Baad Yeh 5 Ghaltiyan Na Karen | Larkiyon Ke Liye Rehnumai
