Khawateen Mein Qabz | Wajuhaat, Alamaat Aur Mukammal Ilaj

 

Qabz ko English mein “Constipation” kaha jata hai. Yeh ek aam digestive problem hoti hai jo aksar khawateen ko zyada pareshan karti hai. Qabz mein pakhana sakht ho jata hai aur bar-bar toilet jane ke bawajood bhi pet theek tarah se khali nahin ho pata.

Qabz Kya Hoti Hai?

Jab aanton ki harkat slow ho jaye aur pakhana jism se kharij karna mushkil ho jaye, is ko Qabz kehte hain.

Saada alfaz mein:

Qabz wo haalat hai jis mein pakhana sakht ho jata hai aur pait theek tarah se saaf nahin ho pata.

Khawateen Mein Qabz Kyun Zyada Hoti Hai?

Waise to Qabz kisi ko bhi ho sakti hai magar khawateen mein qabz zyada hone ki kuch aam wajuhaat yeh hain:

• Pani kam peena.
• Reshay (fiber) wali cheezen kam khana jese keh sabzi, phal ya salad.
• Pakhane ya toilet ko baar baar rokna.
• Chai ya coffee zyada peena.
• Bakery aur junk food ka istemal zyada karna.
• Warzish (exercise) bilkul na karna.
• Hamal ke doran Hormones ke tabdeel hone ki wajah se.

Qabz Ki Alamaat (Symptoms) Kya Hain?

• 2 ya 3 din tak pait ka saaf na hona.
• Pakhana sakht ya khushk hona.
• Toilet mein zor lagane ki zaroorat parna.
• Pait ka phoolna ya dard hona.
• Gas aur bhari-pan.
• Bechaini hona.

Khawateen Ke Liye Qabz Ka Aasan Aur Gharelo Ilaj

1. Pani Zyada Peena

Rozana kam-az-kam 8 se 10 glass pani peena qabz ko khatam karne ke liye bohat zaroori hai.

2. Phal Aur Sabziyan Khana

Apni khorak mein yeh phal aur sabziyan shamil karen.

• Seb, Papita, Amrood
• Palak, Gajar, Loki
• Salad

3. Subah Garam Pani Peena

Subah ke waqt khali pait garam pani ka ek glass peene se pait ki movement behtar hoti hai. Yeh qabz ko khatam karne mein madad karta hai.

4. Rozana Walk Karna

Rozana 20 se 30 minute ke liye walk karna zaroori hai. Is se hazme (digestion) ka nizam behtar hota hai aur qabz ko khatam karne mein madad milti hai.

5. Toilet Jane Ki Routine

Toilet jane ki ek routine honi chahiye. Rozana subah ek hi waqt toilet jane ki koshish karein.

Qabz Ke Ilaj Ke Liye Aasan Desi Totkay

1. Munakka Ke 2 Dane Khana

Munakka mein qudrati tor par fiber hota hai. Yeh aanton ki harkat ko behtar banata hai aur pakhane ko narm karta hai.

Raat ko munakka ke 2 daane pani mein bhigo kar subah khali pait khane se:

• Pait saaf hota hai.
• Qabz mein aaram milta hai.
• Hazma behtar hota hai.

2. Rozana Ispaghol Ka 1 Chamach

Ispaghol fiber ka bohat acha zariya hai. Yeh pait mein pani jazb karke pakhane ko naram karta hai aur toilet jane mein aasani paida karta hai.

Rozana raat ko 1 chamach ispaghol ko 1 glass doodh ya pani ke sath lene se qabz door hoti hai aur pait halka mehsoos hota hai.

3. Papita Ya Nashpati Khana

Papita aur nashpati do aise phal hain jin mein fiber ki miqdar zyada hoti hai. Yeh dono phal hazme ko durust rakhte hain.

In ko rozana khane se:

• Aanton ki safai rehti hai.
• Pakhana naram rehta hai.
• Qabz ka masla kam hota hai.
• Qabz Ke Ilaj Ke Liye Medicine

Qabz ke ilaj ke liye market mein mukhtalif iqsam ki medicines mil jati hain lekin hamesha pehle doctor se mashwara karna behtar hota hai. Khaaskar bachon, buzurgon aur haamla aurton ke liye.

Qabz Ke Liye Aam Istemal Hone Wali Medicines

1. Lactulose Syrup

Lactulose syrup ek mashhoor sharbat hai jo qabz ke ilaj ke liye istemal hota hai. Yeh pakhana naram karta hai aur qabz ka masla kam karta hai.

Istemal Ka Tarika:

1 se 2 chamach raat ko sone se pehle lekin doctor ke mashware se.

Side Effects:

• Gas
• Pait ka phoolna
• Halki matli

Ehtiyaat

Diabetes walay log istemal se pehle doctor se mashwara karein.

2. Duphalac Syrup

Duphalac syrup qabz ke ilaj ke liye istemal hone wala ek mashhoor syrup hai. Is mein Lactulose mojood hota hai. Yeh sharbat bhi pakhana naram karta hai aur toilet jane mein aasani paida karta hai.

Duphalac Syrup Ke Faiday

• Qabz door karta hai.
• Pakhana naram karta hai.
• Bina kisi nuqsan ke dheere dheere asar karta hai.
• Aadat nahin banta (short-term use mein).

Istemal Ka Tarika:

• Baray 1 se 2 chamach raat ko sone se pehle.
• Bachay sirf doctor ke mashware se istemal karein.

Side Effects

• Gas banana.
• Pait ka phoolna.
• Halki matli.

Ehtiyaat

• Roz roz baghair kisi wajah ke istemal na karein.
• Diabetes walay log pehle doctor se poochein (syrup mein sugar ho sakti hai).
• Agar poorani qabz hai to sirf sharbat se khatam nahin ho gi.

3. Cremaffin Plus Syrup

Cremaffin Plus bhi qabz ke ilaj ke liye istemal hone wala ek mashhoor syrup hai. Is mein aam tor par Liquid Paraffin, Milk of Magnesia (Magnesium Hydroxide) aur halka stimulant hota hai. Yeh sab mil kar:

• Pakhana naram karte hain.
• Aanton ki harkat barhate hain.
• Pakhane (stool) ko aasani se nikalne mein madad dete hain.
• Cremaffin Plus Ke Faiday
• Sakht qabz mein jaldi rahat deta hai.
• Pakhane ko naram karta hai.
• Raat ko peene par subah tak asar karta hai.

Istemal Ka Tarika

• Baray 1 se 2 chamach raat ko sone se pehle.
• Bachay sirf doctor ke mashware se istemal karein.

Side Effects

• Pait mein maror ya dard.
• Gas ya pait ka phoolna.
• Zyada istemal par pait kharab ho sakta hai.
• Zyada istemal se aadat ban sakti hai.

Ehtiyaat

Lambe arsay tak rozana istemal na karein.

Jin logon ko kidney ki problem hai wo doctor se pooch kar istemal karein.

Haamla khawateen doctor se pooch kar istemal karein.

Note: Yeh maloomat sirf aur sirf general guide ke liye hai. Kisi bhi dawa ka regular istemal doctor ke mashware ke baghair na karein.

Doctor Ke Paas Kab Jana Chahiye?

Agar:

Qabz 1 haftay se zyada rahe.

Pakhane ke sath khoon aaye.

Wazan achanak kam hone lage.

Bohat zyada pait dard ho.

To foran doctor se mashwara karein.

Double Chin Kaise Khatam Karen? | Gharelo Totkay Aur Exercises