Matric Ke Baad Larkiyon Ko Konsa Course Karna Chahiye? | 10 Short Courses

 

Yeh article un tamam larkiyon ke liye hai jo matric ke baad FA ya BA karne ki bajaye koi short course ya diploma kar ke kaam ya job karna chahti hain. Is ke ilawa yeh article un khawateen ke  liye bhi faidamand hai jo koi short course karna chahti hain lekin faisla nahin kar pa rahin ke konsa course karna chahiye.

Is mazmoon mein hum aaj ke dor ki zaroorat ke mutabiq larkiyon ya khawateen ke liye 10 short courses ke mutaliq batane ja rahe hain. Yeh 10 aise courses hain jin ki aaj ke dor mein kafi maang hai.

Note: Is mazmoon mein bataye hue courses ki duration 2 maah se le kar 1 saal tak hai.

1. Graphic Designing

Graphic designing mein Photoshop aur Illustrator jaise tools ke zariye logos aur posters waghera banana sikhaya jata hai. Aaj ke digital dor mein har choti aur bari company ko designer ki zaroorat hoti hai.

Aise mein agar aap Graphic Designing ka course kar leti hain to aap ko job milne ke chances kafi bar jate hain. Graphic Designing ka course un larkiyon ke liye behtar hai jo computer ko seekhne aur istemal karne mein dilchaspi rakhti hain.

Fayda:

Aaj ke dor mein Graphic Designing ki bohat maang (demand) hai. Yeh ek modern skill hai.

2. Fashion Designing & Tailoring

Yeh larkiyon ya khawateen ka pasandeeda course hai. Is course mein kapron ki cutting, stitching aur modern designs banana sikhaya jata hai. Pakistan mein fashion industry bohat tezi se grow kar rahi hai. Is liye is course ki bhi kafi maang hai.

Aisi tamam larkiyan jin ko kapray salai karna aur kapron par designs banana pasand hai yeh course un larkiyon ke liye behtareen choice hai. Is ke ilawa aisi khawateen jo apna boutique kholna chahti hain yeh short course un ke liye bhi bohat mufeed hai.

Fayda:

Yeh course karne ke baad aap job bhi kar sakti hain aur apna boutique bhi khol sakti hain.

3. Beautician & Makeup Artistry

Fashioin designing ke baad yeh doosra course hai jis mein larkiyan ya khawateen bohat dilchaspi rakhti hain. Is course mein skin care, makeup aur hair styling waghera sikhayi jati hai. Yeh larkiyon ke liye bohat popular field hai. Aisi larkiyan ya khawateen jo apna beauty parlour banane ka irada rakhti hain yeh course un ke liye bohat zaroori hai.

Bridal makeup aur salon services ki hamesha demand rehti hai. Yeh course un larkiyon ke liye bohat mufeed hai jo shadi ya kisi doosre function waghera par larkiyon ka makeup karne mein dilchaspi rakhti hain. Shehar ho ya gaon is kaam ki maang har jagah barabar hai.

Fayda:

Aap apna salon ya beauty parlour bana sakti hain.

4. MS Office Management

Yeh ek computer course ya diploma hai. Is ko matric ke baad aasani se kiya ja sakta hai. Is mein computer par MS Word, MS Excel aur MS PowerPoint ko istemal karna sikhaya jata hai. Office ki job mein in skills ki zaroorat parti hai.

Aaj ke dor mein clerical job ke liye is course ka hona bohat zaroori hai. Yeh diploma un larkiyon ya khawateen ko karna chahiye jo office ya bank ki job karna chahti hain.

Fayda:

Aap clerk, data entry operator ya office assistant ki job kar sakti hain.

5. Interior Decoration Ka Course

Yeh bhi ek aisi field hai jis mein khawateen bohat acha kaam kar rahi hain. Is course mein ghar, office aur shops waghera ko decorate karna yaani sajana aur organized banana sikhaya jata hai. Interior Decoration ka course un larkiyon ya khawateen ke liye behtar choice hai jo colors, designs aur styling waghera mein dilchaspi rakhti hain.

Is ke ilawa aisi housewives ya students jo apni daily routine ke sath sath koi skill bhi seekhna chahti hain, yeh course un ke liye bhi ideal hai. Is course ko mukammal karne ke baad aap job bhi kar sakti hain aur apna business bhi shuru kar sakti hain.

Fayda:

Aap apna business shuru kar sakti hain ya consultant ke tor par kaam kar sakti hain.

6. Montessori Teacher Training

Agar aap bachon ke sath kaam pasand karti hain to yeh course aap ke liye behtar hai. Is course mein teaching karne ke tareeqe sikhaye jate hain. Montessori Teacher Training un larkiyon ya khawateen ke liye ek behtareen course hai jo teaching ka shoq rakhti hain.

Is course mein bachon ko aasan aur interesting tareeqon se parhane ki training di jati hai. Is ke zariye aap school mein teaching job hasil kar sakti hain ya apna Montessori school bhi shuru kar sakti hain.

Fayda:

Aap apna school shuru kar sakti hain. Is ke ilawa private schools mein aasani se job mil sakti hai.

7. Cooking Aur Baking Ka Diploma

Is course mein cakes, bakery items aur cooking skills sikhayi jati hain. Cooking & Professional Baking ka course un larkiyon ke liye bohat behtar hai jo cooking aur baking ka shoq rakhti hain aur apni skills ko professional level tak le jana chahti hain.

Is course mein aap mukhtalif dishes, cakes, pastries aur desserts waghera banana seekhti hain. Is ke sath sath is course mein in cheezon ki presentation aur hygiene ke basic rules bhi sikhaye jate hain. Is course ko karne ke baad aap apna food business shuru kar sakti hain ya bakery khol sakti hain.

Fayda:

Aap bakery khol sakti hain ya apna home-based food business shuru kar sakti hain.

8. Digital Marketing

Is course mein social media par products ko promote karna aur sales barhana sikhaya jata hai. Digital Marketing ka course un larkiyon ke liye bohat valuable hai jo online kaam karke earning karna chahti hain.

Aaj ke digital dor mein har business ko digital marketer ki zaroorat hoti hai. Is liye is field mein job milne ke chances zyada hote hain.

Fayda:

Aaj kal har business ko digital marketer ki zaroorat hoti hai.

9. Clinical Assistant / Pharmacy Assistant

Is course mein medical field ka basic kaam sikhaya jata hai. Clinical Assistant ya Pharmacy Assistant ka course un larkiyon ke liye bohat acha option hai jo medical ki field mein apna career banana chahti hain.

Is course mein basic medical knowledge, patient care, medicines ka istemal aur pharmacy management ke bare mein sikhaya jata hai. Is skill ke zariye aap hospital, clinic ya medical store mein job hasil kar sakti hain. Yeh ek aisa kaam hai jis ki har dor mein har jagah maang rehti hai.

Fayda:

Clinics aur pharmacies mein aasani se job mil jati hai.

10. Arts & Crafts (Fine Arts)

Is course mein painting, sketching aur handmade products banana sikhaya jata hai. Arts & Crafts (Fine Arts) ka course un larkiyon ke liye behtar hai jo drawing, painting aur handmade products banane ka shoq rakhti hain.

Is course mein sketching, painting, handmade crafts aur mukhtalif art techniques sikhayi jati hain. Is ke zariye aap apna handmade products (hath se bani hui cheezon) ka business shuru kar sakti hain aur exhibitions waghera mein apna kaam display kar sakti hain.

Fayda:

Aap apni handmade cheezen online bech sakti hain.

Konsa Course Sahi Rahe Ga?

Kya aap yeh soch rahi hain ke in mein se konsa course sahi rahe ga? Apne shoq aur dilchaspi ko dekh kar course select karein. Agar aap ko designing pasand hai to Graphic Designing ya Fashion Designing behtar hai. Agar aap teaching ya bachon ke sath kaam pasand karti hain to Montessori course best hai.

Natija:

Aaj ke dor mein hunar seekhna bohat zaroori hai. Matric ke baad koi bhi acha hunar seekh lena aap ke mustaqbil ko behtar bana sakta hai aur aap ko self-dependent bana sakta hai. Chahe aap job karna chahti hon ya apna chhota sa business shuru karna chahti hon, yeh courses aap ko ek mazboot start de sakte hain.

Larkiyon Ko Matric Ke Baad Kya Parhna Chahiye? (FSc, ICS, I.Com, FA)