Double Chin Kaise Khatam Karen? | Gharelo Totkay Aur Exercises

 

Double Chin Kya Hoti Hai?

Double chin ko Urdu mein “Dohri Thori” kaha jata hai. Yeh asal mein thori (chin) ke neeche charbi jama hone ki wajah se banti hai.

Jab thori ke neeche charbi zyada jama ho jaye ya jild loose ho jaye to wahan jism ki ek doosri layer ban jati hai jo dekhne mein bilkul “Double Chin” lagti hai.

Kya Double Chin Ban Jana Koi Bemari Hoti Hai?

Double chin ban jana koi bemari nahin hoti. Lekin yeh aap ki khoobsurti ko kam kar sakti hai. Double chin sehat ke liye nuqsan-deh bhi nahin hoti lekin yeh self-confidence par bohot asar (affect) daalti hai.

Isi liye kayi khawateen is ko scarf, muffler ya makeup se chhupane ki koshish karti hain. Kuch khawateen to double chin ko khatam karne ke liye surgery bhi karwa leti hain.

Double Chin Kyun Banti Hai?

• Wazan zyada hone ki wajah se double chin ban sakti hai.
• Umer zyada hone ki wajah se jild loose ho jati hai is wajah se bhi double chin ban sakti hai.
• Kuch logon mein double chin qudrati (naturally) hoti hai.
• Muscles ke loose ho jane ki wajah se bhi double chin ban sakti hai.

Kya Double Chin Ko Khatam Kiya Ja Sakta Hai?

Is mamle mein khawateen ke liye achhi khabar yeh hai ke kuch aise gharelo totkay (home remedies) aur exercises hain jin ki madad se double chin ko naturally khatam kiya ja sakta hai.

Double Chin Ko Khatam Karne Ke Liye Gharelo Totkay

1. Cocoa Butter Se Massage

Cocoa butter skin ko tight karta hai aur dead skin ko hata kar double chin kam karne mein madad deta hai.

Istemal Ka Tarika:

• 1 se 2 chamach cocoa butter ko halka garam kar lein.
• Isay chehre, thori aur gardan par lagayen.
• 15 minutes tak halki malish karein.
• Malish hamesha gardan se thori ki taraf karein.
• 15 minutes ke baad cocoa butter ko dhona nahin hai. Raat bhar laga rehne se behtar result milte hain.
• Isay roz raat ko repeat karein.

2. Green Tea Ka Istemal

Cocoa Butter ke baad double chin ko khatam karne ke liye doosri ahm cheez hai green tea. Green tea antioxidants se bharpoor hoti hai. Yeh calories ko jalati hai, skin ko taro-taza (fresh) banati hai aur barhti hui umer ke asraat ko kam karti hai.

Istemal Ka Tarika:

• Rozana 3 cup green tea piyen.
• Istemal shuda tea bags se gardan aur thori par halki halki malish karein.
• Is se double chin kam karne mein madad milti hai.

3. Doodh Ki Malai Aur Shahad

Doodh ki balai (malai) skin ko foran tight karti hai. Doodh ki malai mein shahad mila kar lagane se thori aur gardan ki skin zyada firm lagti hai.

Istemal Ka Tarika:

Malai se gardan aur thori par kuch minutes ke liye malish (massage) karein.

Ya phir:

• Doodh ki malai aur shahad ka mask bana kar gardan aur thori par lagayen.
• 10 minutes ke liye laga rehne dein.
• Phir halkay garam pani se wash kar lein.

4. Zaitoon Ka Tail

Zaitoon ka tail bhi skin ke masail ko khatam karne mein ahm kirdar ada karta hai. Aap double chin ko khatam karne ke liye zaitoon ka tail bhi istemal kar sakti hain.

Istemal Ka Tarika:

• Thori par cotton ki madad se zaitoon ka tail lagayen.
• Phir plastic ki sheet se thori (chin) ko band kar lein.
• Oper se garam towel 45 minutes ke liye lapet lein.
• Is process ko rozana dohrana hai.

Double Chin Khatam Karne Ke Liye Exercises

1. Gardan Ko Ghumana

Is exercise mein aap ne din mein do martaba, apni gardan ko gol gol ghumana hai. Is exercise se khoon ki gardish behtar hoti hai aur double chin kam hoti jati hai.

2. Zuban Bahir Nikaal Kar Ginti

Apni zuban ko bahir nikaal kar 10 tak ginti ginain. Is exercise ko din mein 5 se 6 baar karein. Yeh exercise thori (chin) ke neeche ke muscles ko tight karti hai.

Double chin ko khatam karna koi mushkil kaam nahin hai. Agar aap thori si care, rozana exercises aur oper bataye hue gharelo totkon ko apni routine ka hissa bana lein to double chin bohot aasani se kam ho jati hai.

Aankho Ke Neeche Soojan Ki Wajuhaat Aur Gharelo Totkon Se Ilaaj