Jigar (liver) hamare jism mein ek bohat hi ahm aur bunyadi cheez
hai. Yeh humein sehatmand rakhne ke liye be-shumar zimmedariyan ada karta hai.
Jigar sirf ghiza ko hazam karne mein hi madad nahin karta balkay
khoon ko saaf karna, zehreelay maddon ko jism se kharij karna aur zaroori
protein banana bhi isi ke kaam hain.
Jigar Ko Sehatmand Rakhna Kyun Zaroori Hota Hai?
Jigar ka sehatmand hona sehat ke liye bohat zaroori hota hai.
Agar jigar sehatmand na ho to mukhtalif iqsam ke masail paida ho sakte hain. In
mein se kuch ahm yeh hain:
1. Ammonia Ki Satah Barh Jati Hai
Agar kisi shakhs ka jigar bohat zyada kharab ho jaye jis ko “Cirrhosis
Liver” kaha jata hai to bohat se sangeen masail paida ho sakte hain.
Misaal ke tor par agar is halat mein Qabz ho jaye ya hazme ki
nali mein rukawat paida ho jaye to jism mein “Ammonia” ki satah barhne lagti
hai.
Aam halat mein jigar ammonia ko urea mein tabdeel karta hai aur
phir gurday is ko peshab ke zariye kharij kar dete hain. Lekin jab jigar theek tarah
se kaam na kar raha ho aur qabz bhi ho jaye, to ammonia jism mein jama ho kar
dimagh ki taraf jata hai. Is se behoshi aur hatta ke coma tak ki soorat-e-haal bhi
paida ho sakti hai.
2. Khoon Ka Behna Band Nahin Hota
Agar jigar apna kaam theek se na kare to chot ya zakhm lagne
par khoon ka behna band nahin hota. Is ki wajah yeh hai ke jigar hi woh
proteins banata hai jo khoon ko jamne mein madad dete hain.
3. Jism Mein Pani Jama Hone Lagta Hai
Jigar ek aur ahm protein “Albumin” bhi banata hai. Jab
albumin kam ho jaye to jism mein pani jama hone lagta hai. Is se tangon, paon
aur aankhon ke neeche soojan paida hona shuru ho jati hai.
4. Detoxification Ka Kaam Nahin Ho Pata
Jigar ka ek aur bunyadi kaam “Detoxification” hai. Is ka
matlab hai keh jigar zehreeli dawaon, ghalat ghizaon aur nuqsan-deh maddon ko
jism se bahir nikaalta hai. Agar jigar theek na ho to yeh kaam bhi theek tarah
se nahin ho pata.
Kuch log yeh samajhte hain ke zehreelay madday jigar mein
jama rehte hain. Lekin asal mein jigar unhein khatam kar deta hai ya kharij kar
deta hai.
Jigar Ko Sehatmand Rakhne Wali 6 Ghizayein
Kya aap janti hain keh jigar ki sehat ke liye kya faydemand
hai ya jigar ko sehatmand rakhne ke liye kya khana chahiye?
Agar nahin to aaj aap 6 aisi ghizayon ke mutaliq parhne ja
rahi hain jo jigar ko sehatmand rakhne mein bohat ahm kirdar ada karti hain.
1. Lehsan (Garlic)
Is fehrist mein sab se pehla number hai lehsan ka. Lehsan
hamare gharon mein aam istemal hota hai. Lekin is ke faiday kam log hi jante
hain.
Lehsan jigar se fazool aur zehreelay maddon ko kharij karne
mein jigar ki madad karta hai. Yeh “Enzymes” ki paidaish ko barhata hai. Apne
jigar ko sehatmand rakhne ke liye lehsan ko apni khorak mein zaroor shamil
karen.
2. Anday (Eggs)
Lehsan ke baad doosre number par hain anday. Andon mein
protein, amino acids aur khaas tor par choline hota hai jo jigar ko sehatmand rakhne
mein madad deta hai.
Choline jigar mein charbi ko jama hone se rokta hai. Anday
khaas tor par un logon ke liye zyada mufeed hote hain jo fatty liver ka shikar
hon ya jin ka metabolism thora slow hota hai.
3. Sabz Patton Wali Sabziyan
Agar aap jigar ko sehatmand rakhna chahti hain to sabz patton
wali sabziyon ka istemal zaroor karen. In mein palak, band gobhi, phool gobhi,
broccoli, salad ke pattay aur kale jesi sabziyan jigar ke liye nihayat mufeed mani
jati hain.
Yeh sabziyan jigar ko “Detoxification” ke amal mein madad
faraham karti hain. Yeh sabziyan khaas tor par un logon ke liye zyada mufeed
hain jo processed foods zyada istemal karte hain.
4. Chukandar (Beetroot)
Jigar ko sehatmand rakhne ke mamle mein chukandar bhi ek ahm sabzi
hai. Chukandar jigar ko saaf rakhne ke liye bohat acha hota hai. Chukandar ka
juice peena, salad mein khana ya pakka kar khana jigar ko sehatmand rakhta hai.
Is se jigar behtar kaam karta hai.
5. Lemon Aur Doosre Citrus Phal
Lemon aur doosre citrus phal jaise keh mosami, kino aur
santaray jigar ko sehatmand rakhne mein madad karte hain. In phalon mein
Vitamin C hota hai jo jigar ko ganday madday (toxins) jism se kharij karne mein
madad karta hai.
Is ke sath sath yeh jism ke immune system ko bhi mazboot banata
hai. In phalon ke istemal se jigar sehatmand rehta hai.
6. Machhli Aur Zaitoon Ka Tail
Salmon, sardine aur mackerel jesi machhliyon mein “Omega-3”
hota hai jo jigar ki soojan ko kam karta hai aur jigar ki sehat ko behtar banata
hai. Jab jigar mein soojan kam hoti hai to jigar apna kaam behtar tareeqe se
karta hai. Is se “Fatty Liver” ka khatra bhi kam ho sakta hai aur jigar mazboot
rehta hai.
Isi tarah extra virgin zaitoon ka tail bhi jigar ke liye
bohat mufeed hota hai. Yeh tail achhi charbi (healthy fat) faraham karta hai.
Zaitoon ka tail jigar mein jama hone wali ghair zaroori charbi ko kam karne aur
cholesterol ko control mein rakhne mein bhi madad deta hai.
Jigar Ka Test Karwana Kab Zaroori Hota Hai?
Agar pait ke daayein hisse mein, kandhay ya peeth mein dard
ho ya jigar ki jagah par bechaini mehsoos ho to “Abdominal Ultrasound” aur LFT
(Liver Function Test) zaroor karwa lena chahiye.
Is ke ilawa kuch doosre tests bhi hote hain jin se jigar ki haalat
ka andaza lagaya jata hai. Jese keh:
- AST
- ALT
- Alkaline Phosphatase
- Albumin
- Bilirubin
- PT
- INR
Agar aap apni ghiza ka khayal rakhein, sehatmand cheezon ka istemal karein aur waqt par apne medical tests karwati rahein to jigar ko bohat si khatarnaak bemariyon se bachaya ja sakta hai.
){kind=link}
0 Comments