Freezer Mein Gosht Rakhne Ka Sahi Tarika Kya Hai?

Gosht ko dair tak fresh rakhne ka sab se behtar tarika freezer ka sahi istemal hai. Aksar khawateen qurbani ka gosht freezer mein rakhti hain lekin sahi tareeqe se na rakhne ki wajah se gosht kharab ho jata hai.

Lekin aaj ke baad freezer mein rakha hua gosht kharab nahin ho ga. Aaj aap freezer mein gosht rakhne ka sahi aur behtareen tarika roman Urdu mein parhne ja rahi hain.

1. Gosht Ko Dho Kar Freezer Mein Nahin Rakhna

Bohat si khawateen gosht ko dho kar freezer mein rakhti hain. Yeh tarika theek nahin hai. Kyun?

Gosht ko dho kar rakhne se us mein nami (moisture) paida ho jati hai. Is nami ki wajah se gosht mein se smell aana shuru ho jati hai aur gosht ka rang bhi tabdeel ho sakta hai.

Gosht ko sirf saaf kar ke pack karein aur freezer mein rakh dein. Jab us ko pakana (cook) ho to freezer se nikaal kar dho lein.

2. Gosht Ke Chote Chote Packets Bana Kar Rakhein

Zyada tar log gosht ka ek hi packet bana kar freezer mein rakh dete hain. Sara gosht ek hi packet mein rakhna ghalat hai.

Gosht ke chote chote packets bana kar freezer mein rakhein. Aisa karne se yeh faida ho ga keh jab bhi aap ko pakane ke liye gosht ki zaroorat ho gi to aap ko sara gosht freezer mein se bahir nahin nikaalna pare ga.

3. Gosht Ki Packing Air-Tight Honi Chahiye

Agar aap chahti hain keh freezer mein rakha hua gosht kharab na ho to us ki packing air-tight honi chahiye. Is ka matlab yeh hai keh gosht ko is tarah se pack karna hai keh hawa packet ke andar na ja sake.

4. Har Packet Par Label Lagana Yaad Rakhein

Freezer mein rakhne se pehle gosht ke har packet par tareekh (date) zaroor likhein. Is se yeh faida ho ga keh aap ko maloom ho ga keh pehle kon sa gosht istemal karna hai.

Label Ki Misaal:

Beef Qeema – 15 Nov
Chicken Breast – 20 Nov

5. Beef, Mutton Aur Chicken Ko Ek Sath Nahin Rakhna

Beef, mutton aur chicken ko ek sath mat rakhein. Alag tarah ke gosht ko alag alag rakhein. Alag tarah ke gosht ko ek sath rakhne se un ki smell mix hone ka dar hota hai. Koshish karein keh beef alag section mein, chicken alag section mein aur qeema alag section mein ho.

6. Haddi Wala Gosht Alag Pack Karein

Haddi wale gosht ko bhi alag se pack kar ke rakhein. Haddi wale gosht ke barey pieces ki wajah se packets phool jate hain. Is liye haddi wala gosht alag aur boneless gosht alag rakhein.

7. Gosht Ke Liye Freezer Temperature Kitna Hona Chahiye?

Gosht ka asli zaiqa tab hi barqarar rehta hai jab freezer ka temperature 18°C ho ya is se kam ho. Freezer ka temperature barqarar rakhne ki koshish karein. Freezer ko bohat zyada bhar dene aur bar bar kholne aur band karne se freezer ka temperature tabdeel hota rehta hai.

8. Gosht Ko Freezer Mein Kitne Din Rakha Ja Sakta Hai?

Kya aap jaanti hain keh aap chicken, beef ya mutton ko freezer mein zyada se zyada kitne din tak mehfooz rakh sakti hain?

Sahi tareeqe se freeze kiya gaya gosht zyada arsey tak kharab nahin hota. Lekin phir bhi gosht ko ek waqt tak hi freezer mein store kiya ja sakta hai.

Beef / Mutton 8 se 12 mahine
Chicken 6 se 9 mahine
Qeema 3 se 4 mahine
Machli (Fish) 3 se 6 mahine

Note: Qeemay ko hamesha pehle istemal karein. Qeema sab se jaldi kharab hota hai.

9. Freezer Se Nikle Gosht Ko Dobara Freezer Mein Na Rakhein

Freezer se nikle hue gosht ko dobara freezer mein na rakhein. Gosht ko ek dafa pighlane ke baad dobara jamana (freeze) sehat ke liye nuqsan-deh hota hai.

Behtar to yeh hai keh aap gosht ko chote chote packets mein pack kar ke freezer mein rakhein. Taake ek packet ko freezer se nikaalne ke baad dobara rakhne ki zaroorat hi na pare.

Freezer mein Gosht rakhna mushkil kaam nahin hai. Bus thori si ehtiyat aur sahi tarah se pack karne ki zaroorat hoti hai.