Larkiyon Ko Matric Ke Baad Kya Parhna Chahiye

Matric ke baad kya parhna chahiye? Yeh ek aisa sawal hai jo har us larki ke zehan mein aata hai jis ne matric ka imtihaan paas kar liya ho ya paper de kar result ka wait kar rahi ho.

Yeh sawal banta bhi hai. Kyun ke hamare mulk mein larkiyon ki taleem ke mamle mein counseling na hone ke barabar hai. Aisi soorat-e-haal mein fikarmand hona jaiz hai.

Matric mukammal karne ke baad agla qadam kya hona chahiye, yeh faisla bohat ahm hota hai kyunki isi par aap ke mustaqbil ki bunyaad rakhi jati hai. Sahi field ka intikhab na sirf aap ke career ko behtar banata hai balkay aap ki dilchaspi aur salahiyaton ko bhi nikhar deta hai.

Matric Ke Baad Larkiyon Ko Kya Parhna Chahiye?

Matric ke baad aage parhne ke liye larkiyon ke paas jo mukhtalif options hote hain hum un ki tafseel neeche aasan alfaz mein batane ja rahe hain.

1. FSc

Is fehrist mein sab se pehla number FSc ka hai. FSc ka matlab hota hai “Faculty of Science”. Aisi tamam larkiyan jo matric science ke subjects ke sath paas kar chuki hain aur aage bhi science ke subjects ke sath hi parhna chahti hain FSc un ke liye behtareen option hai.

Khaas tor par aisi larkiyan jo matric ke baad medical ya engineering ki fields mein jana chahti hain un ke liye FSc karna lazmi hai. Agar trend ki baat ki jaye, to is waqt sab se zyada trend FSc ka hi hai.

Aaj ke dor mein science ki bohat ahmiyat hai. Science ki field thori mushkil zaroor hoti hai, lekin agar dilchaspi ho to yeh bohat rewarding bhi hoti hai. Is ke zariye larkiyan doctor, engineer, scientist, lecturer aur researcher jaise mukhtalif professions mein ja sakti hain.

FSc Ke Kitne Groups Hote Hain?

FSc ke basically 2 groups hote hain.

Pre-Medical

Yeh group un larkiyon ke liye behtar hai jo medical field mein jana chahti hain. Is mein Biology, Chemistry aur Physics jaise subjects parhaye jate hain. Aisi larkiyan jo doctor, dentist ya kisi medical field mein jana chahti hain yeh un ke liye best hai.

Pre-Engineering

Yeh group un larkiyon ke liye behtar hai jo engineering aur technology ki field mein career banana chahti hain. Is mein Mathematics, Physics aur Chemistry jaise subjects parhaye jate hain.

FSc Kin Larkiyon Ke Liye Behtar Hai?

FSc un larkiyon ke liye behtar hai jo science ke subjects mein interest rakhti hain aur apna future professional fields mein banana chahti hain. FSc un larkiyon ke liye bhi behtar hai jo mehnati aur focused hain aur challenging subjects ko samajhne ka jazba rakhti hain.

FSc Ka Doraniyan (Duration)

2 Saal

FSc Ke Subjects

1. FSc Pre-Medical Subjects

Biology
Chemistry
Physics
English
Urdu
Islamiat (1st year)
Pakistan Studies (2nd year)

2. FSc Pre-Engineering Subjects

Mathematics
Chemistry
Physics
English
Urdu
Islamiat (1st year)
Pakistan Studies (2nd year)

Pros:

Doctor, Engineer, ya Scientist banne ka wahid rasta hai.
FSc ki market mein bohat value hai.
FSc ke baad aap Arts ya Commerce ki fields mein bhi ja sakti hain.
FSc mein parhne se mehnat ki aadat ho jati hai jo aage life mein kaam aati hai.

Cons:

Syllabus bohat lamba aur tough hota hai, din raat parhna parta hai.
Medical colleges mein admission lene ke liye 90% se zyada marks aur Entry Test ki zaroorat hoti hai.
Medical aur Engineering ki aage ki parhai mein kafi kharcha karna parta hai.

2. ICS

FSc ke baad number aata hai ICS ka. ICS ka matlab hai “Intermediate in Computer Science”. Yeh ek 2 saal ka intermediate program hota hai jo matric ke baad kiya jata hai. ICS un students ke liye hota hai jo computer, IT ya software field mein interest rakhti hain. ICS ke baad BCS aur phir MCS karna aasan ho jata hai.

Aaj ke digital dor mein ICS ki ahmiyat din-ba-din barhti ja rahi hai. ICS ek ahm field hai jis mein aap ko computer aur technology ki basic skills sikhai jati hain. Aaj ke dor mein IT ki demand bohat zyada hai, is liye ICS karne se larkiyon ke liye achay career aur jobs ke chances barh jate hain.

ICS ke baad larkiyon ke paas bohat se options hote hain, jaise:

BS Computer Science
BS Software Engineering
BS Information Technology

ICS Kin Larkiyon Ke Liye Behtar Hai?

Aisi larkiyan jo kisi wajah se FSc nahin kar saktin lekin parhna science ke subjects ke sath hi chahti hain, ICS un ke liye ek behtareen option hai. Is ke ilawa ICS un larkiyon ke liye bhi best hai jo computer, math aur technology mein interest rakhti hain aur future mein IT ki field mein jana chahti hain.

ICS Ka Doraniyan (Duration)

2 Saal

ICS Ke Subjects

Computer Science
Mathematics
Physics ya Statistics
English
Urdu
Islamiat (1st year)
Pakistan Studies (2nd year)

Pros:

Aaj ka dor IT ka hai, is liye jobs ki opportunities bohat zyada hain.
Yeh sirf theoretical nahin balke practical field hai.
Aap IT ke sath sath teaching ya bank jobs mein bhi ja sakti hain.

Cons:

Sara din computer ke saamne baithne se sehat aur nazar par bura asar par sakta hai.
Technology roz badalti rehti hai, is liye aap ko har waqt naya seekhna parta hai.
Agar aap ka Math kamzor hai, to ICS mein programming samajhna thora mushkil ho sakta hai.

3. I.Com

I.Com ka matlab hota hai “Intermediate in Commerce”. Yeh bhi ek 2 saal ka program hota hai jo matric ke baad kiya jata hai. Yeh un students ke liye hota hai jo business, accounting aur finance mein interest rakhte hain. Is mein students ko accounting, commerce aur business ke basic concepts sikhaye jate hain, jo aage chal kar banking, business ya B.Com aur BS Commerce mein madadgar hote hain.

I.Com students ke liye bohat ahm hai kyun ke I.Com mein un ko business, accounting aur finance ka basic knowledge diya jata hai. Is se larkiyan bank ya office job kar sakti hain ya apna business bhi shuru kar sakti hain.

I.Com Kin Larkiyon Ke Liye Behtar Hai?

Aisi larkiyan jo matric ke baad sada taleem hasil karne ki bajaye professional taleem hasil karna chahti hain, I.Com un ke liye ek behtareen option hai. Is ke sath sath, I.Com un larkiyon ke liye bhi best hai jo business, accounting aur finance mein interest rakhti hain.

Agar kisi larki ko hisaab kitaab karna pasand hai ya wo bank ya office ki job karna chahti hai, to I.Com us ke liye ek sahi choice hai.

I.Com Ka Doraniyan (Duration)

2 Saal

I.Com Ke Subjects

1^st Year

Principles of Economics
Principles of Accounting
Principles of Business Mathematics
Principles of Commerce
Urdu
English
Islamiyat (Ethics for non-Muslims)

2^nd Year

Principles of Accounting
Banking / Computer Studies
Commercial Geography
Statistics
Urdu
English
Pakistan Studies

Pros:

Accounting aur Finance ki samajh bohat jaldi aa jati hai.
I.Com ke baad kisi bhi private office ya bank mein aasani se entry-level job mil sakti hai.
CA ya ACCA jaise baray professional courses ke liye yeh behtareen bunyaad hai.
Yeh field larkiyon ko apna chota karobar (business) chalane mein madad deti hai.

Cons:

Aap I.Com ke baad Medical ya Engineering ki field mein wapas nahin ja saktin.
Sara din numbers aur calculation ka kaam hota hai jo har kisi ke liye dilchasp nahin hota.
Banking sector mein competition bohat zyada hai.

4. F.A

FA ka matlab hota hai “Faculty of Arts“. Yeh bhi ek 2 saal ka intermediate program hota hai jo matric ke baad kiya jata hai. Yeh un students ke liye hota hai jo arts, literature aur social sciences mein interest rakhte hain.

Is mein aap ko English, Urdu, history, psychology, sociology, civics, economics jaise subjects parhaye jate hain. FA ke baad aap BA aur phir MA kar sakti hain. Hamary mulk mein aise tamam students jo FSc, ICS aur I.Com ke mushkil subjects ko pasand nahin karte wo FA karne ko tarjeeh dete hain.

FA Kin Larkiyon Ke Liye Behtar Hai?

Hamary mulk mein bohat si aisi larkiyan hain jo matric ke baad school ya college nahin ja sakti aur ghar baith kar private parhna chahti hain, FA aisi tamam larkiyon ke liye ek behtareen option hai. Is ke ilawa aisi larkiyan jo FSc aur ICS jese mushkil subjects ko pasand nahin karti aur aasan subjects ke sath apni taleem mukammal karna chahti hain, FA un ke liye bhi best option hai.

FA Ka Doraniyan (Duration)

2 Saal

FA Ke Subjects

English
Urdu
Islamiat (1st year)
Pakistan Studies (2nd year)

FA Optional Subjects

(Larkiyan in mein se apni pasand ke koi se 3 subjects chun sakti hain.)

History
Civics
Islamiat Optional
Economics
Psychology
Punjabi
Persian

Pros:

FSc aur ICS ke muqable mein is ka syllabus aasan aur dilchasp hota hai.
Interior Designing, Fashion Designing, Fine Arts, aur Psychology mein jane ke liye best hai.
Larkiyan ghar baith kar aasani se private exam de sakti hain.
Competitive exams (CSS/PMS) ke liye FA ke subjects (History, Civics) boht madadgar hote hain.

Cons:

Log samjhte hain ke shayad FA sirf "Nalaiq" bachay karte hain (ghalat tasawwur hai).
Science aur Technology se doori ki wajah se modern technical jobs milna mushkil hota hai.
Agar aap ne subjects sahi nahin chunay, to aage ja kar career options mehdood ho sakte hain.

Natija

Matric ke baad sahi field ka intikhab aap ki zindagi ka sab se ahm faisla hai. Is post mein hum ne dekha ke har field ke apne fawaid aur challenges hain. Magar sawal yeh hai ke aap ke liye sab se behtar kya hai?

Faisla karte waqt in 3 baaton ko hamesha yaad rakhein:

Apni Dilchaspi Dekhein

Kisi ke dabao mein aa kar ya sirf saheliyon ko dekh kar koi field mat chunein. Agar aap ko computer pasand hai to ICS behtar hai, aur agar aap ko hisaab kitaab karna mushkil lagta hai to I.Com ya FSc ke bajaye FA behtar option ho sakta hai.

Apni Salahiyat (Ability) Ko Pehchanein

FSc ya I.Com mein zyada mehnat ki zaroorat hoti hai. Agar aap sakht mehnat kar sakti hain to phir mushkil raah ka intekhaab karne se mat darein.

Mustaqbil Ka Plan

Sochein ke aap aglay 5 saal baad apne aap ko kahan dekhna chahti hain? Kya aap doctor banna chahti hain, ek kamyab businesswoman ya phir IT expert?

Koi bhi field choti ya bari nahin hoti. Kamyabi sirf is baat mein hai ke aap jo bhi parhein, dil laga kar parhein aur us mein muharat hasil karein. Agar aap mehnat karein gi to FA kar ke bhi aap CSS officer ban sakti hain.