Aankho Ke Neeche Soojan Ki Wajuhaat Aur Gharelo Totkon Se Ilaaj

 

Aankhon Ke Neeche Soojan Kya Hoti Hai?

Aankhon ke neeche soojan asal mein “Puffiness” ya “Swelling” ko kehte hain. Yeh aam tor par aankhon ki eyelids ke neeche nazar aati hai. Yeh soojan tab hoti hai jab aankhon ke neeche pani jama ho jata hai ya khoon ki gardish theek se nahin hoti.

Aankhon Ke Neeche Soojan Kyun Hoti Hai?

Aankhon ke neeche soojan ki kai wajuhaat ho sakti hain. In mein se kuch aam wajuhaat yeh hain:

1. Neend Ki Kami Hona

Agar aap ki neend theek se poori na ho rahi ho to aap ki aankhon ke neeche pani jama hone se soojan paida ho sakti hai.

2. Stress Aur Thakawat

Thakawat ya stress ki wajah se bhi aankhon ke neeche soojan ho sakti hai.

3. Zyada Namak Wale Khane

Namak zyada khane se jism mein pani jama hota hai jo aankhon ke neeche soojan ka sabab banta hai.

4. Allergies Ya Infection

Aankhon ki allergy ya infection se bhi aankhon ke neeche soojan paida ho sakti hai.

5. Zyada Umar Ki Wajah Se

Jaise jaise umar barhti jati hai, skin ki elasticity kam ho jati hai, jis ki wajah se aankhon ke neeche pani jama ho jata hai aur aankhen sooji hui nazar aati hain.

Aankhon Ki Soojan Kam Karne Ke Liye Gharelo Totkay

1. Tea Bags Se Aankhon Ki Soojan Ka Ilaaj

Tea bags (green ya white tea) mein Caffeine hoti hai jo aankhon ke neeche pani bharne se hone wali soojan ko kam karti hai.

Tarika:

• Do tea bags ko garam pani mein 5 minute ke liye bhigo kar rakhein.
• Is ke baad in naram tea bags ko apni aankhon ke papoton (eyelids) par rakhein aur oper se kisi soft kapre se dhak dein.
• 30 minute ke baad tea bags ko hata dein.
• Yeh amal din mein 2 se 3 martaba karein.

2. Nariyal Ke Tail Se Soojan Kam Karna

Aap aankhon ki soojan ko kam karne ke liye nariyal ka tail bhi istemal kar sakti hain. Nariyal ka tail har tarah ki soojan ko kam karne ki khasusiyat rakhta hai. Yeh tail aankhon ki soojan ko kam karne mein bhi madad karta hai.

Tarika:

• Raat ko sone se pehle nariyal ka tail apni aankhon ke gird laga kar halki halki malish (massage) karein.
• Tail ko subah tak aankhon par laga rehne dein.
• Rozana sone se pehle yeh amal karein.

3. Coffee Aur Kali Mirch Ka Powder

Coffee mein caffeine hoti hai aur kali mirch (black pepper) mein khoon ki gardish (circulation) ko behtar banane ki salahiyat hoti hai. In dono ko mix kar ke lagane se aankhon ki soojan ko kam kiya ja sakta hai.

Tarika:

• Thori si coffee aur kali mirch ke powder ko nariyal ke tail mein mila kar ek paste bana lein.
• Is paste ko halke hath se aankhon ke neeche lagayein.
• 10 se 12 minute tak is paste ko laga rehne dein.
• Is ke baad is paste ko cotton se saaf kar lein.

4. Steel Ke Thande Chamach (Spoon) Ki Therapy

Aap aankhon ki soojan ko kam karne ke liye kitchen mein mojood steel ka chamach bhi istemal kar sakti hain. Steel ka thanda chamach khoon ki gardish (blood circulation) ko behtar karta hai aur soojan ya puffiness ko kam karta hai.

Tarika:

• Steel ke chamach ko fridge mein 30 minute tak rakhein.
• Is ke baad is thande chamach ko 15 se 20 minute ke liye apni aankhon ke neeche rakhein.
• Is se aankhon ke neeche khoon ki gardish behtar ho gi aur soojan kam ho gi.

5. Baking Soda Ya Namak Wala Pani

Baking soda ek qudarti Exfoliator (jild saaf karne wala) hai. Yeh skin ke murda cells ko nikaal kar skin ko tar-o-taza (fresh) bana deta hai. Is mein chhilka utarne ki salahiyat mojood hoti hai. Yeh aankhon ke neeche hone wali soojan ko kam karne mein bhi madad karta hai.

Tarika:

• Aadha cup halka garam pani lein. Pani zyada garam na ho.
• Is pani mein aadha chamach baking soda daalein aur mix kar lein.
• Do “Cotton Balls” is pani mein bhigo lein.
• Dono aankhon par ek ek cotton ball rakh dein.
• 10 se 15 minute tak in cotton balls ko aankhon par rahne dein.
• Is se soojan kam hone lage gi.

Note: Baking soda ki jagah khane wale namak ko bhi istemal kiya ja sakta hai.

6. Kheeray Ke Slices

Aankhon ki jild ki baat ho rahi ho aur kheeray ka naam na aaye aisa to ho hi nahin sakta . Thanda kheera aankhon ke neeche hone wali soojan ya puffiness ko kam karne ke liye istemal kiya ja sakta hai.

Tarika:

• Kheeray ke slices bana kar fridge mein 15 se 20 minute ke liye rakhein.
• Is ke baad in slices ko 10 se 15 minute ke liye apni aankhon par rakhein.
• Is se aap ki aankhon ko thandak mehsoos ho gi aur soojan mein kami aaye gi.

7. Anday Ki Safedi Ka Mask

Aankhon ki soojan ko kam karne ke liye anday ki safedi ko bhi istemal kiya jata hai. Anday ki safedi aankhon ke neeche ki soojan aur wrinkles ko kam karti hai.

Tarika:

• Sab se pehle anday ki safedi ko achhi tarah phent kar foam bana lein.
• Ab is ko kisi naram brush se apni aankhon ke neeche lagayein.
• Lagane ke 15 minute ke baad is ko saaf pani se dho lein.

8. Aloe Vera Gel

Aloe vera mein vitamins aur antioxidants hote hain jo aankhon ke neeche ki skin ko refresh karte hain. Is liye aloe vera ko aankhon ke neeche ki soojan ko kam karne ke liye bhi istemal kiya jata hai.

Tarika:

• Taza gel ko apni aankhon ke papoton par lagayein.
• Lagane ke baad is ko 8 se 10 minute ke liye laga rehne dein.
• Is ke baad thande pani se dho lein.
• Yeh amal din mein 2 martaba karein.

In gharelo totkon ko istemal karne se aankhon ke neeche hone wali soojan ko kam kiya ja sakta hai. Lekin agar soojan ya sozish zyada ho aur sath mein dard ya jalan bhi ho to doctor se mashwara zaroor karein.

Phati Ariyon Ke Liye Aasan Gharelo Totkay | Phati Ariyon Ka Ilaaj!