Phati Ariyon Ke Liye Aasan Gharelo Totkay | Phati Ariyon Ka Ilaaj!

 

Sardiyon ka mosam apni thandak aur khushk hawaon ke sath sath jild (skin) ke kai masail bhi le aata hai. In hi masail mein se ek aam masla hai Phati Hui Ariyan. Yeh na sirf dekhne mein buri lagti hain balkay aksar takleef aur jalan ka sabab bhi banti hain.

Ariyan Phatne Ki Wajuhaat Kya Hain?

Ariyon ke phatne ki sab se bari wajah khushk mosam aur nami ki kami hoti hai. Is ke ilawa:

• Zyada dair tak kharay rehna.
• Chemical wale sabun (soap) ka istemal karna.
• Ghalat jooton (shoes) ka istemal karna.
• Wazan ka zyada hona.
• Thanda mosam.
• Diabetes ya Eczema jese maraz bhi is maslay ko barha dete hain.

Phati Ariyon Ke Ilaaj Ke Liye Gharelo Totkay

Kuch aise aasan gharelo totkay mojood hain jin ki madad se aap ghar par hi phati hui ariyon ka ilaaj kar sakti hain ya ariyon ko phatne se rok sakti hain.

1. Neem Garam Pani Se Pairon Ko Dhona

Raat ko sone se pehle ek tub mein neem garam pani aur thora sa liquid sabun mila kar 20 minute tak apne pairon ko is pani mein bhigo kar rakhein.

Phir pair ragarne wale pather (pumice stone) se apni ariyon ko halka halka ragarein taake murda jild nikal jaye.

Is ke baad pairon ko dho kar sukha len aur Moisturizer ya cream laga kar soti kapray ke mozay (cotton socks) pehan lein. Yeh amal rozana karein jab tak aap ki ariyan bilkul theek na ho jayein.

2. Nariyal Ka Tail Lagana

Nariyal ka tail ariyon ko nami deta hai aur “Fungal Infection” se bhi bachata hai. Raat ko sone se pehle apne pairon ko neem garam pani mein kuch dair bhigo kar sukha lein. Phir pairon par nariyal ka tail laga kar mozay pehan lein.

3. Menthol Balm Ka Istemal

Menthol mein mojood tail phati hui ariyon ko narm karta hai. Yeh pairon ka infection bhi khatam karta hai. Sone se pehle apni ariyon par menthol balm laga kar mozay pehan lein aur subha pairon ko dho lein.

Yeh amal tab tak karein jab tak aap ke pairon ki khurdari jild nikal na jaye. Yeh totka un khawateen ke liye bhi mufeed hai jo apne pairon ki khurdari skin ki wajah se pareshan rehti hain.

4. Paraffin Wax Cream Ka Istemal

Paraffin wax ek tarah ki cream hoti hai. Yeh jild ko narm banati hai. Aap thori si Paraffin Wax ko garam kar ke us mein nariyal ya sarson ka tail mila kar phati hui ariyon ke liye istemal kar sakti hain.

Yeh mixture raat ko sone se pehle ariyon par laga kar mozay pehan lein aur poori raat laga rehne dein. Subha pairon ko dho kar saaf kar lein. Yeh amal ek haftay tak rozana karein. Aap ki phati hui ariyan theek hona shuru ho jayen gi.

5. Glycerin Aur Lemon

Phati hui ariyon ke liye Glycerin ka istemal bohat zyada kiya jata hai. Yeh bohat purana totka hai. Lekin agar Glycerin mein lemon ka ras mila kar istemal kiya jaye to yeh sirf Glycerin lagane se zyada behtar hai.

Glycerin aur lemon ka juice barabar miqdar mein mila lein. Agar aap chahen to is mein Arq-e-Gulab bhi mila sakti hain. Is mixture ko rozana phati hui ariyon par lagayein aur 20 minute ke baad pairon ko dho lein. Do hafton tak rozana yeh amal karein.

6. “Epsom Salt” Ka Istemal

Yeh ek tarah ka namak hota hai. Lekin yeh wo namak nahin hai jo aap khane ke liye istemal karti hain. Epsom salt mein Magnesium hota hai jo jild ko tazgi deta hai. Aap is ko bazar se khareed sakti hain.

Neem garam pani ke tub mein 1.5 cup Epsom Salt mila kar apne pairon ko 10 minute tak is pani mein bhigo kar rakhein. Phir pairon ko ragarne wale pather se apne pairon ko halka halka ragarein. Is ke baad pairon ko dho kar Moisturizer laga lein.

7. Sirkay Wala Pani

Phati hui ariyon ke liye sirkay ka istemal bhi aam hai. Sirka jild ko naram karta hai. Sirkay (apple cider vinegar) ka aadha ya 1 cup do cup pani mein mila kar pairon ko 10 se 15 minute tak is pani mein bhigo kar rakhein.

Phir pairon ko ragarne wale pather se halka halka ragarein. Pairon ko ragarne ke baad dho kar in par Moisturizer laga lein.

8. Lemon Ka Istemal

Lemon apni tezabi (acidic) khasiyat ki wajah se murda jild ko nikalta hai aur jild ko naram banata hai.

Neem garam pani mein lemon ka ras mila kar apne pairon ko 10 minute tak is pani mein bhigo kar rakhein. Phir naram brush se pairon ko saaf kar ke Moisturizer laga lein. Yeh amal hafte mein 2 se 3 martaba karein.

9. Kelay Ka Mask

Aap phati hui ariyon ko theek karne ke liye kelay ka mask bhi istemal kar sakti hain. Bohat zyada pakay hue ya ghalay hue kelon ka paste bana kar ariyon par lagayein.

Is paste ko ariyon par 15 se 20 minute tak laga rehne dein aur phir garam ya thanday pani se dho lein. Yeh amal ariyon ko phatne se bachata hai aur purani khurdari jild ko khatam karta hai.

Tips:

Ariyon ki nami ko barqarar rakhne ke liye moisturizer ka istemal apni aadat bana lein. Sardiyon ke dinon mein pani zyada piya karen.

Pimples Kyun Bante Hain Aur In ka Ilaaj Kaise Karein?