Pimples Kyun Bante Hain Aur In ka Ilaaj Kaise Karein?

 

Har insan, chahe wo mard ho ya aurat, us ki khawahish hoti hai keh us ki skin saaf aur khoobsurat nazar aaye. Khaas kar khawateen apni jild ke mamle mein zyada fikarmand hoti hain.

Lekin aksar logon ko jild par Pimples ya muhason ka samna karna parta hai. Yeh ek aisi skin problem hai jo khaas tor par jawani ke dinon (teenage) mein zyada hoti hai.

Chaliye samajhte hain keh yeh pimples asal mein hote kya hain, yeh kaise bante hain, kyun bante hain aur in ka ilaaj kis tarah se kiya ja sakta hai.

Pimples Kya Hote Hain?

Pimples asal mein tab bante hain jab hamari skin ke massam ya sorakh (pores) band ho jate hain. Hamari jild (skin) mein ek natural oil hota hai jis ko “Sebum” kehte hain. Jab yeh oil, dead skin cells aur bacteria ke sath mil kar skin ke massam ko band kar deta hai, to us jagah par chhoti si soojan (inflammation) paida hoti hai jis ko hum Pimple kehte hain.

Pimples Kis Umar Mein Zyada Bante Hain?

Pimples 12 se 25 saal ki umar ke darmiyan zyada bante hain. Is umar mein jism mein Hormones badal rahe hote hain, jis se skin zyada oil (tail) banati hai. Yeh tail jab dhool, bacteria aur dead skin cells ke sath mil jata hai, to skin ke massam (pores) band ho jate hain aur Pimples nikal aate hain. Lekin pimples 25 saal ke baad bhi nikal sakte hain.

Kya Pimples Har Kisi Ko Bante Hain?

Nahin, pimples har kisi ko nahin bante. Lekin zyada tar logon ko zindagi mein kabhi na kabhi ban jate hain. Khaas taur par naujawani (teenage) mein.

Kya Pimples Ko Daba Kar Khatam Kar Dena Chahiye?

Pimples ko press ya squeeze nahin karna chahiye. Yeh chhoti si galti kai baar bare nuksaan ka sabab ban jati hai.

Jab pimple ko zor se dabaya jata hai to andar ka bacteria aur oil skin ke neeche fail jata hai. Is se soojan (inflammation) barh jati hai aur daag reh jata hai. Is se kabhi kabhi infection bhi ho jata hai.

Sab se ahm baat keh jo pimple 3 se 4 din mein theek ho sakta hai, us ko chhairne se 1 hafte ya us se bhi zyada waqt lag sakta hai.

Pimples Hone Ki Wajuhaat (Causes)

1. Skin Ka Zyada Tail (Oil) Banana

Hamari skin ek tail banati hai jis ko “Sebum” kaha jata hai. Yeh skin ko naram (soft) rakhne ke liye hota hai. Lekin jab yeh tail zyada ban jata hai to is ki wajah se skin ke massam ya sorakh (pores) band ho jate hain aur Pimples nikal aate hain.

2. Mail Aur Dhool Mitti

Agar chehre ko saaf na rakha jaye to dhool, mitti aur pasina waghera skin ke massam (pores) ko band kar dete hain. Yeh band massam aakhir mein Pimples bana dete hain.

3. Hormones Ka Badalna

Jab jism ke Hormones kisi wajah se badalte hain (jaise keh teenage, stress ya periods ke waqt) to skin zyada oil banati hai. Is se bhi Pimples ban jate hain.

4. Oily Ya Spicy Khanay

Zyada oily, spicy ya meetha khana khanay se bhi pimples ban sakte hain. Is ke ilawa junk food ka bhi skin par bura asar parta hai.

5. Stress Aur Neend Ki Kami

Jab aap pareshan hote hain ya aap ki neend theek se poori na ho rahi ho to jism ke hormones disturb ho jate hain. Is se bhi Pimples nikalne ka khatra barh jata hai.

6. Ganda Takia Istemal Karna

Wo takia (pillow) jis par sar rakh kar aap soti hain, agar ganda hai to bhi chehre par pimples ban sakte hain. Ganda takia bacteria se bhare hua hota hai. Jab chehra us se touch karta hai to pimples banne ke chances barh jate hain.

Pimples Se Bachne Ke Tareeqe

• Rozana subah aur sham ke waqt face wash se chehra dhoen.
• Oily aur spicy khanon se parhez karein.
• Pani zyada piya karein.
• Ganday hathon se apne chehre ko chhoone se parhez karein.
• Pimples ko dabaane se parhez karein.
• Neem aur aloe vera jesi natural cheezon ka istemal karein.
• Makeup kam istemal karna chahiye.
• Takiye ka cover saaf hona chahiye.

Pimples Ka Gharelo Totkon Se Ilaaj

Kuch aise gharelo totkay mojood hain jin ki madad se Pimples ka ilaaj ghar par hi mumkin hai.

1. Tea Tree Oil

Tea tree oil ek natural Anti-Bacterial oil hota hai jo pimples ke germs ko khatam kar deta hai.

Istemal Ka Tarika:

• Cotton par thora sa tea tree oil lagayen.
• Sirf pimple wali jagah par is ko rub karein.
• Phir 10 se 15 minute ke baad chehre ko dho lein.

Yeh pimples ko sukha deta hai aur naye pimples ko banne se rokta hai.

2. Cheeni Ya Namak Ka Scrub

Cheeni aur namak dono “Exfoliate” karte hain. Yani keh yeh dono skin ke dead cells ko hata kar massam (pores) ko saaf karte hain.

Istemal Ka Tarika:

• Chehre ko halka sa geela kar lein.
• Thori si cheeni ya namak lekar circular motion mein 30 seconds tak massage karein.
• Phir pani se dho lein.

Yeh aap ki skin ko smooth aur fresh bana deta hai aur band massam ko saaf kar deta hai.

3. Green Tea Mask

Green tea ek Antioxidant hai jo skin mein mojood zyada oil ko kam karti hai.

Istemal Ka Tarika:

• Khushk green tea ke thore se patte pani mein mila lein.
• Is mixture ko 30 seconds tak face par halkay hath se rub karte rahen.
• Is ke baad pani se dho lein.

Is ki madad se skin ke oil ko kam kiya ja sakta hai aur pimples ke nishanaat ko bhi kam kiya ja sakta hai.

4. Garam Kapra Lagana

Pimples wali jagah par garam kapra lagane se blood circulation tez hoti hai jis se pimples jaldi theek hote hain.

Istemal Ka Tarika:

• Kapray ko garam pani (taqreeban 35°C) mein bhigo lein.
• Pimples par 5 minute tak rakhein.
• Din mein 3 se 4 dafa aisa karein.

 Aisa karne se pimples ke theek hone ka process tez ho jata hai.

5. Barf Ka Istemal

Pimples ko khatam karne ke liye barf ka istemal bhi kiya ja sakta hai. Pimples wali jagah par barf (ice) lagane se soojan, redness aur dard teeno kam ho jate hain.

Istemal Ka Tarika:

• Barf ka cube ek patlay kapray mein lapait lein.
• 10 minute tak pimples par lagayen.
• Rozana 2 se 3 dafa yeh process karein.

Yeh soojan ko kam karta hai aur skin ko cool rakhta hai.

Note: Koi bhi naya totka istemal karne se pehle patch test zaroor karein. Agar jalan ya allergy mehsoos ho to foran band kar dein.

Pimples Ka Medical Ilaaj

Pimples ka medical ilaaj un logon ke liye hota hai jin ke pimples zyada barh jate hain, dard karte hain ya phir jin logon par gharelo totkay asar nahin karte.

Neeche doctors ke recommend kiye gaye kuch medical treatments diye gaye hain.

Jild Par Lagane Wali Medicines

Yeh creams ya gels hoti hain jo seedha skin par lagai jati hain.

1. Benzoyl Peroxide

Yeh bacteria ko maarne aur soojan ko kam karne ke liye istemal hoti hai.

Example: Brevoxyl, Benzac AC

2. Salicylic Acid

Is ko band massam (pores) ko kholne ke liye istemal kiya jata hai.

Example: Clean & Clear, Neutrogena SA Wash

3. Retinoids (Vitamin A derivatives)

Yeh medicine naye pimples ko banne se rokti hai aur purane nishanaat (scars) ko kam karti hai.

 Example: Adapalene, Tretinoin

Note: Retinoids ko raat mein lagaya jata hai aur dhoop se bachna zaroori hota hai.

4. Antibiotic creams

Yeh creams bacteria aur soojan (inflammation) dono ko kam karne ke liye hoti hain. Yeh creams infection ke chances ko kam karti hain.

Example: Clindamycin, Erythromycin Creams

Khane Ke Liye Medicines

Agar pimples zyada ban rahe hon to doctors aap ko khane ke liye kuch medicines bhi likh kar de sakte hain.

1. Antibiotics

Doctors aksar “Doxycycline” ya “Minocycline” jaisi antibiotics recommend karte hain. Yeh medicines bacteria aur soojan (inflammation) dono ko kam karti hain. Antibiotics hamesha mehdood muddat (limited time) ke liye di jati hain.

2. Hormonal Treatment (Sirf Khawateen Ke Liye)

Agar pimples hormonal imbalance ki wajah se ho rahe hon, to birth control pills ya Anti-Androgen medicines jaise “Spironolactone” waghera di ja sakti hain. Yeh treatment hormones ko balance karta hai aur pimples ko kam karta hai.

3. Isotretinoin (Accutane)

Yeh acne ke liye sab se powerful medicine mani jati hai. Is ka istemal sirf bohat shadeed (severe) acne ke liye kiya jata hai. Is dawa ko sirf doctor ki strict monitoring mein lena chahiye. Kyunki is ke side effects ho sakte hain.

Note: In mein se koi bhi medicine doctor ki hidayat ke baghair kabhi istemal na karein.

Pimples Ke Clinical Treatments

Skin ke mahir doctor ko “Dermatologist” kaha jata hai. Pimples ka ilaaj sirf creams ya gharelo nuskhon se hi nahin, balki clinic mein kuch special treatments ke zariye bhi kiya jata hai.

1. Chemical Peels

Is process mein chemical solution laga kar dead skin aur skin mein mojood zyada oil ko remove kiya jata hai. Is se skin ke massam (pores) saaf ho jate hain aur skin fresh lagti hai.

2. Laser Therapy

Is therapy mein acne ke bacteria ko khatam kiya jata hai aur acne ke scars (nishan) ko kam kiya jata hai. Laser se skin ka texture bhi behtar hota hai.

3. Extraction

Is treatment mein dermatologists manually blackheads aur whiteheads ko nikalte hain taake skin clean aur smooth ho jaye.

4. Microneedling

Microneedling ek cosmetic treatment hai jo skin ko tazgi aur khoobsurti dene ke liye kiya jata hai. Is mein chhoti chhoti suiyan (micro needles) skin ke upar chalai jati hain. Is se “Collagen” aur “Elastin” ki production barhti hai aur skin young aur smooth lagti hai.

Phati Ariyon Ke Liye Aasan Gharelo Totkay | Phati Ariyon Ka Ilaaj!