Kitchen Ko Sajana Kyun Zaroori Hota Hai?
Kitchen har ghar ki zaroorat hai. Kitchen ghar ka dil hota
hai. Yeh wo jagah hoti hai jahan pooray khandan ke liye lazeez khane bante
hain. Yeh wo jagah hoti hai jahan baith kar aap khana khate hain.
Is liye, aap ka kitchen na sirf saaf-suthra hona chahiye,
balkeh khoobsurat aur behtar tareeqe se manage kiya hua bhi hona chahiye.
Agar aap apne kitchen ko sajana aur ek naya look dena chahti
hain to yeh article aap ke liye hi hai. Is article mein khawateen ke liye kitchen
ko sajane, khoobsurat banane aur manage karne ke tareeqe aur tips roman Urdu
mein diye gaye hain.
1. Kitchen Mein Halke Rangon Ka Istemal
Kitchen ko sajane ke liye sab se pehla aur zaroori qadam
(step) hai sahi rangon ka istemal karna. Kitchen ki dewaron par halke rang istemal
karen. Misaal ke tor par safed, halka neela ya off-white waghera. In rangon ki
madad se aap ka kitchen bara aur roshan dikhai de ga.
Note: Agar aap ko pasand ho to kisi ek dewar par aap gehra
rang bhi laga sakti hain.
2. Kitchen Mein Sahi Roshni Ka Intezam
Roshni kitchen ki khoobsurti mein ek ahm kirdar ada karti
hai. Kitchen mein sirf ek bulb ya tubelight kafi nahin. Aap kitchen ko sajane
ke liye mukhtalif iqsam ki lights ka istemal kar sakti hain.
Sabziyan kaatne ki jagah ya counter par alag se LED lights
lagayen. Is se kaam karte waqt behtar roshni mile gi.
Aap cupboards ke andar ya open shelves par “LED Strip Lights”
laga kar apne kitchen ko ek stylish look de sakti hain. Ceiling lights ki tadad
mein izafa karne se kitchen zyada roshan aur saaf-suthra nazar aata hai.
3. Kitchen Mein Smart Storage Solutions
Ek sajaye hue kitchen ka matlab hota hai ek “Organized Kitchen”.
Kitchen mein storage solutions par khaas tawajjo dene ki zaroorat hoti hai.
Shelves Aur Cabinets Ka Sahi Istemal
Kitchen mein khane ke bartan, masale aur baqi samaan ko ek
tarteeb se rakhne ke liye shelves aur cabinets ka sahi istemal karen. Is se
kitchen saaf-suthra nazar aye ga.
Hooks Aur Racks Lagana
Kitchen mein bartan latkane ke liye hooks aur masalon ki
bottles ke liye racks lagayen. Is se counter ka oper wala hissa khali rahe ga
aur jagah zyada lage gi.
Dividers Ka Istemal
Drawers mein dividers ka istemal karein. Is ka yeh faida ho
ga keh sara saman alag-alag rahe ga. Misaal ke tor par chamach, chhuri aur
kaante waghera.
4. Sajawat Ki Cheezon Ka Istemal
Apne kitchen ko sajane ke liye aap kitchen mein sajawat ki
mukhtalif cheezen istemal kar sakti hain.
Kitchen Mein Poday (Plants) Rakhna
Kitchen mein chote-chote plants bhi rakhe ja sakte hain. Misaal
ke tor par tulsi ya podina (mint) waghera. Yeh poday na sirf kitchen ko sajane
mein madad karen gay balkeh in se kitchen mein taazgi bhi ho gi.
Kitchen Mein Painting Lagana
Aap kitchen mein koi painting bhi laga sakti hain. Choti si
painting ya wall art aap ke kitchen ko ek modern look de sakti hai.
Kitchen Mein Guldan (Vase) Rakhna
Aap bazar se ek khoobsurat guldan khareed kar apne kitchen
mein rakh sakti hain. Yeh guldan aap ke kitchen ki sajawat mein izafa kare ga.
5. Bartanon Ka Sahi Intekhab (Utensils)
Kitchen mein rakhe hue bartan bhi kitchen ki sajawat ka hissa
hote hain. Koshish karein keh aap ke kitchen mein jo bartan mojood hon wo
bartan ek hi set ke hon ya un ka rang ek jaisa ho. Kitchen mein mukhtalif rang
aur nasal ke bartan rakhne se parhez karen.
Transparent Jars
Kitchen mein masalon aur daalon ko transparent jars mein
rakhen. Ye na sirf kitchen mein rakhe hue khoobsurat lagte hain, balkeh in mein
rakhi hui cheez aasani se nazar aa jati hai.
6. Kitchen Mein Counter Top Ko Khali Rakhna
Kitchen ko saaf-suthra aur khoobsurat dikhane ka sab se aasan
tarika hai counter ko oper se khali rakhna. Counter ke oper sirf wohi cheezen
rakhen jo aap rozana istemal karti hain. Misaal ke tor par coffee machine ya
toaster waghera. Baqi sab cheezon ko cupboards mein rakhen.
In aasan tips ko follow karke aap apne kitchen ko ek naya aur khoobsurat look de sakti hain. To aap kab se shuru kar rahi hain apne kitchen ko sajane ka kaam?
0 Comments