Bathroom Ko Sajana Kyun Zaroori Hai?

Zyada tar khawateen apne ghar ko sajane par to bohot dhayan (heed) deti hain lekin bathroom ko bilkul nazar andaz kar deti hain.

Washroom wo jagah hoti hai jahan subah jagne se le kar raat sone tak hum kai dafa jate hain. Subah ka aaghaz aur din ka ikhtitam (end) bhi yahin se hota hai. Koi bhi din aisa nahin hota jis din hum ne washroom mein na jana ho. Phir washroom ko sajane par kyun dhayan nahin diya jata?

Kyun na ghusal-khane (bathroom) ko bhi utna hi khoobsurat aur pur-sukoon banaya jaye jitna aap ka baqi ghar hai? Ghar ke baqi hisson ki tarah aap ka bathroom bhi khoobsurat nazar aana chahiye.

Is page par aap apne bathroom ko sajane ka tarika roman Urdu mein parhein gi. Yahan par aap kuch aise aasan aur mufeed tips parhein gi jin se aap apne bathroom ko ek naya aur shandaar look de sakti hain.

1. Bathroom Ki Dewaron Ka Rang Kaisa Hona Chahiye?

Zyada tar log bathroom ki dewaron par wo rang karte hain jo ghar ki baqi dewaron par karne ke baad bach jata hai. Magar aisa nahin hona chahiye.

Bathroom ki dewaron ke liye hamesha halkey aur fresh colors ko choose karein. Jaise ke safed, halka neela, mint green ya phir cream color. In rangon se aap ka bathroom na sirf bara nazar aye ga, balke bathroom saaf-suthra bhi lage ga. Yeh rang aap ke bathroom mein ek khushgawar mahol paida karen gay.

2. Kya Washroom Mein Sirf Ek Light Ya Bulb Kafi Hai?

Roshni kisi bhi jaga ko khoobsurat banane mein ahm kirdar ada karti hai. Bathroom mein aksar log sirf ek bulb ya light laga dete hain. Lekin bathroom ko sajane ke liye sirf ek ceiling light kafi nahin hoti.

Agar aap aainay (mirror) ke dono taraf lights laga deti hain to is se na sirf aap ko apna chehra zyada saaf nazar aye ga balke bathroom ki sajawat mein bhi izafa ho ga. Is ke ilawa, aap bathroom ko sajane ke liye “Mood Lighting” ya “Dimmable Lights” ka istemal bhi kar sakti hain.

3. Bathroom Mein Cheezon Ko Idhar-Udhar Nahin Rakhna

Bathroom mein bikhri hui cheezon se bathroom chota aur messy lagta hai. Bathroom mein zameen ke oper cheezein idhar-udhar bhikhri hui na hon. Is ke liye bathroom mein “Smart Storage Solutions” ka istemal bohot zaroori hai.

Aap ek “Floating Shelf” laga kar us ke oper shampu, soaps aur lotions waghera ko achi tarah se ek tarteeb mein rakh sakti hain. Is ke baad, basin ke neeche bhi cabinets banaye ja sakte hain. Is ke ilawa, aap dewar par ek choti almaari (cabinet) bhi laga sakti hain.

Tip: Bathroom mein corner shelf lagana bhi ek acha option hota hai.

Aisa karne se na sirf aap ke bathroom ki sajawat mein izafa ho ga, balke koi bhi cheez bathroom mein idhar-udhar pari hui nazar nahin aye gi. Is se aap ka bathroom saaf-suthra aur khoobsurat nazar aye ga.

4. Bathroom Mein Aaina (Mirror) Kis Tarah Ka Lagana Chahiye?

Bathroom mein ek chota aaina (mirror) lagane ki bajaye agar ek baray size ka aaina lagaya jaye to yeh bathroom ki sajawat mein izafa kare ga. Is se bathroom zyada roshan aur chamakdar nazar aye ga.

Bazar mein mukhtalif iqsam ke aainay dastyab (available) hote hain. Aap apni pasand ke mutabiq apne bathroom ke liye ek aaina select kar sakti hain. Aap bathroom mein ek designer frame wala aaina laga kar apne bathroom ko modern aur stylish look de sakte hain.

5. Bathroom Mein Poday (Plants) Rakhna

Bathroom ko sajane ke liye bathroom mein poday bhi rakhe ja sakte hain. Poday bathroom mein ek natural aur taza mahol paida karte hain.

Bathroom mein rakhne ke liye aise poday choose karen jin ko kam roshni aur nami (humidity) pasand ho. Aap is ke liye “Snake Plant”, “Peace Lily” ya “Aloe Vera” jaise poday select kar sakte hain. Aap in ko shelves par rakh sakte hain.

6. Bathroom Ke Liye “Rug” Ya “Mat” Kis Rang Ka Hona Chahiye?

Bathroom mein kisi bhi rang ka rug ya mat nahin rakhna chahiye. Bathroom mein rakhne ke liye us rang se milte-julte rang ka “Rug” ya “Mat” select karen jo rang bathroom ki dewaron ka ho. Is tarah ka rug ya mat aap ke bathroom ka hissa lagay ga.

Tip: Bathroom se purane aur pheeke rang ke towels ko hata kar naye aur soft towels ka istemal karein.

7. Bathroom Ko Sajane Ke Liye Choti Choti Cheezein

Kabhi kabhi choti choti cheezein bara farq paida karti hain. Yeh choti choti cheezein mil kar aap ke bathroom ko sajane mein ahm kirdar ada karti hain.

Bathroom mein “Stylish Soap Dispensers” aur “Toothbrush Holders” ka istemal karein.
Bathroom mein khushboo wali mom-battiyan (Scented Candles) ya “Reed Diffusers” lagane se bathroom mein halki halki mehak rehti hai.
Bathroom mein toliye (towel) ke liye achay design ke hanger ya “Towel Hooks” lagayen.
Tissue papers ke liye achi quality ke stylish “Tissue Holders” istemal karen.
Bathroom ko saaf rakhna aap ke hath mein hota hai. Bathroom ko zyada se zyada saaf rakhen.

Natija

In aasan tips par amal karne ke baad aap ka bathroom bilkul saaf, naya aur decorated nazar aye ga. Ab aap ke baqi ghar ki tarah aap ka bathroom bhi khoobsurat nazar aye ga.

Kitchen Ko Sajane Aur Stylish Banane Ka Tarika