Blood Pressure (BP) Check Karne Ka Sahi Tarika

 

Mahireen ke mutabiq agar blood pressure sahi tareeqe se check na kiya jaye to jo reading aati hai woh aap ke asal blood pressure ki theek tasveer pesh nahin karti.

Bohat si khawateen blood pressure ki reading kam ya zyada dekh kar foran pareshan ho jati hain. Lekin kya aap janti hain keh yeh pareshani aksar blood pressure ghalat tareeqe se check karne ki wajah se hoti hai.

Ghar ke kaam, zehni dabao, thakan ya jazbati kaifiyat mein check kiya gaya blood pressure ya li gai reading zyada tar durust nahin hoti. Lekin khawateen usi reading ko sach samajh kar khauf ka shikar ho jati hain.

Blood Pressure Machine Ki Readings Ghalat Kaise Aati Hain?

Blood pressure (BP) check karna har shakhs ke liye bohat zaroori hai, khaas tor par khawateen ke liye. Lekin aksar log BP check karte waqt kuch choti choti ghaltiyan kar dete hain.

In ghaltiyon ki wajah se BP machine ki readings ghalat aati hain aur fazool mein hi pareshani paida ho jati hai. Is article mein aap jaanen gi keh blood pressure check karne ka sahi tarika kya hai aur aksar log check karte waqt kon si ghaltiyan karte hain.

Blood Pressure Check Karne Ka Sahi Tarika

Blood pressure check karne ka sahi tarika kya hai aur wo kon si ghaltiyan hain jo blood pressure check karte waqt ki jati hain? Neeche aap in baaton ko aasan alfaz mein parhein gi.

1. Thori Dair Sukoon Se Baithna Zaroori Hai

Sab se pehle yeh baat yaad rakhein keh blood pressure check karne se pehle kam-az-kam 5 minute tak bilkul sukoon aur itminan se baithna zaroori hota hai.

Chalne phirne, ghar ke kaam karne, exercise karne, kisi se behas karne ya seerhiyan charhne ke foran baad BP check nahin karna chahiye. Kyun keh is waqt reading arzi tor par zyada aa sakti hai.

2. Chai Ya Coffee Nahin Peeni Chahiye

Agar aap blood pressure check karne ja rahi hain to kam-az-kam 30 minute pehle chai, coffee, cola drinks, cigarette ya alcohol se parhez karna hai. Yeh cheezen waqti tor par blood pressure ko barha deti hain.

3. Sahi Tarah Se Baithna Hai

Blood pressure check karte waqt aap ke baithne ka tarika bohat ahmiyat rakhta hai.

Kursi par bilkul seedha baithna hai, peeth kursi se tiki hui ho, dono paon zameen par seedhe rakhne hain, ek paon par doosra paon nahin rakhna aur pairon ki ungliyon ko bhi nahin morna.

Bazoo ko maiz par aaram se rakhein aur is baat ka khayal rakhein ke blood pressure machine ki patti dil ke barabar level par ho.

4. Patti Ko Lapetne Ka Sahi Tarika

Blood pressure machine ki patti ko kapron ke oper nahin balkay seedha bazoo ki jild par lapetna chahiye.

Yeh patti kohni ke mor se taqreeban do ungliyan oper honi chahiye. Agar blood pressure machine ki patti bohat tight ho, dheeli ho ya chhoti ho to ghalat aur high reading aa sakti hai.

5. BP Check Karte Waqt Baat Nahin Karni Chahiye

Bohat si khawateen BP check karte waqt baatein karti rehti hain ya un ki tawajjoh idhar udhar hoti hai. Yeh bhi bilkul ghalat hai.

Jab machine blood pressure ko naap rahi ho to na baat karein, na hansain aur na hi koi harkat karein. Aap ko yeh jaan kar herani ho gi keh sirf baat karne se bhi BP machine aap ka blood pressure zyada zahir kar sakti hai.

6. Blood Pressure Ko 2 Dafa Check Karein

Sirf ek dafa BP check kar ke faisla karna theek nahin hota. Mahireen kehte hain keh ek ya do minute ke waqfay ke baad 2 readings lein aur un ka average note karein.

Kabhi kabhi dono bazuon ki reading lena bhi zaroori hota hai. Aisa us waqt zyada zaroori hota hai jab reading zyada aa rahi ho.

Sirf ek dafa blood pressure check karne se high blood pressure ka faisla karna theek nahin hota.

7. Blood Pressure Check Karne Ke Liye Sahi Waqt

Blood pressure check karne ke liye behtareen waqt subah nashta karne se pehle aur raat ko sone se pehle hota hai. Khana khane ke foran baad blood pressure normal se zyada aa sakta hai.

8. Baar Baar Blood Pressure Check Na Karein

Agar aap apne blood pressure ke zyada hone se pareshan rehti hain to baar baar BP check karne se koi faida nahin hota. Aisa karne se sirf zehni dabao aur ghabrahat mein izafa hota hai.

Blood Pressure Ke Numbers Kya Batate Hain?

Oper wale number ko Systolic pressure kehte hain. Yeh us waqt ka pressure batata hai jab dil khoon ko pump kar raha hota hai.

Neeche wala number Diastolic pressure hota hai. Yeh us waqt ka pressure batata hai jab dil aaram ki haalat mein hota hai.

Natija

Blood pressure ghalat tareeqe se check karne par ghalat maloomat milti hai aur bila-wajah ki pareshani paida ho jati hai. Is liye zaroori hai keh BP hamesha sukoon ke sath baith kar aur sahi waqt par check kiya jaye.

Note: Agar sahi tareeqe se check karne ke baad bhi BP lagataar zyada aa raha ho to doctor se mashwara zaroor karein.

Khawateen Mein Qabz | Wajuhaat, Alamaat Aur Mukammal Ilaj