Bedroom Ko Sajana Kyun Zaroori Hai?

Bedroom ghar ka woh hissa hota hai jahan insan din bhar ki thakan ke baad sukoon se sota hai. Bedroom sirf sone ki jagah ka naam nahin hai, yeh insan ki shakhsiyat (personality) ka aaina bhi hota hai. Bedroom ko khoobsurat aur araam-deh (comfortable) banana behad zaroori hota hai.

Yeh mazmoon aap ki apne kamre ko sajane mein madad kare ga. Is mein aap apne bedroom ko sajane aur khoobsurat banane ka mukammal tarika roman Urdu mein parhein gi.

1. Bedroom Ki Dewaron Ka Rang Koi Bhi Na Ho!

Bedroom ki dewaron ke liye rangon ka intekhab bohat ehtiyat se karen. Koi bhi rang pakar kar dewaron par nahin laga dena. Yeh aap ke kamre ki sajawat ka sawal hai.

Dewaron Par Halke Rangon Ka Istemal Karen

Bedroom ki dewaron ke liye halke rangon ka intekhab karen. Misaal ke tor par light blue, soft grey, cream, beige aur light green jaise rang ideal hote hain. Yeh rang aap ki aankhon ko thandak pohanchate hain aur aap ke kamre ki khoobsurti mein izafa karte hain.

Ek Dewar Par Gehra Rang Istemal Kiya Ja Sakta Hai

Agar aap ko gehre rang pasand hain to bedroom ki kisi ek dewar ko aap gehre ya apni pasand ke rang se paint karwa sakti hain.

2. Bedroom Mein Furniture Ki Tarteeb

Bedroom mein furniture ko is tarah rakhein ke kamra khula khula lage aur chalne phirne mein koi rukawat na ho.

Bed Ko Rakhne Ki Jagah

Bed hamesha kamre ka focal point hota hai. Is ko zyada tar dewar ke beech mein rakha jata hai. Taza hawa aur roshni ke liye aap bed ko khirki (window) ke saamne rakh sakti hain.

Sirf Zaroorat Ka Furniture

Bedroom mein sirf wohi furniture rakhein jis ki aap ko zaroorat ho. Misaal ke tor par ek bed, 2 side tables, ek wardrobe aur ek chota dressing table ya study desk kafi hota hai. Zyada furniture rakhne se kamra tang lagta hai aur chalne phirne mein mushkil hoti hai.

Note: Aise bed jin ke neeche storage ho woh jagah bachane mein madad karte hain.

3. Bedroom Ki Sajawat Mein Roshni Ka Kirdar

Roshni ke baghair bedroom ko sajana mumkin hi nahin hai. Bedroom ki sajawat mein izafa karne ke liye aap mukhtalif iqsam ki lights istemal kar sakti hain.

Bedroom mein ceiling light aisi ho jo poore kamre mein roshni de. Aap dimmers bhi laga sakti hain. Dimmers lagane se aap roshni ki shiddat (intensity) ko control kar sakti hain. “Bedside Lamps” parhne ke liye zaroori hote hain. Is ke ilawa, dressing table ke paas bhi achhi roshni honi chahiye.

In lights ke ilawa, din ke waqt bedroom mein natural light bhi aani chahiye. Is ke liye halke rang ke parde ya blinds ka istemal karein jo roshni ko andar aane dein.

4. Bedroom Mein Parde, Bedsheets Aur Cushions

Parde, bedsheets aur cushions kamre ko khoobsurat banane mein ahm kirdar ada karte hain.

Parde Double Lagayein

Kamre mein hamesha double parde lagayein. Ek “Sheer Curtain” jo din mein roshni ko filter kare aur doosra “Blackout Curtain” jo raat mein neend ke liye roshni ko roke. Pardon ke rang dewaron ke rang se milte julte ya contrast mein ho sakte hain.

Bedsheets Aur Cushions

Bedsheet ka rang select karne se pehle dewaron ke rang ka dhayan rakhen. Agar dewaren gehre rang ki hain to halke rang ki bedsheet achi lage gi. Is ke ilawa, zyada roshni wale kamre mein gehre rang aur kam roshni wale kamre mein halke rang ki bedsheet achi lagti hai.

Bedroom ko sajane ke liye aap mukhtalif iqsam ke cushions bhi bazar se khareed kar kamre mein rakh sakti hain.

5. Bedroom Ko Sajane Ke Liye Choti Choti Cheezein

Choti choti cheezein bedroom ko personal touch deti hain.

Dewaron Par Photos Lagana

Bedroom ki dewaron par apni pasand ki art ya family photos lagane se na sirf kamre ki sajawat mein izafa hota hai balke kamre mein ghar jaisa ehsaas bhi paida hota hai.

Bedroom Mein Poday Rakhna

Kuch indoor plants bhi hote hain jin ko aap apne kamre mein rakh sakti hain. Misaal ke tor par “Snake Plant” ya “Money Plant” waghera. Yeh poday na sirf kamre ki khoobsurati ko barhate hain balke hawa ko bhi saaf karte hain.

Bedroom Mein Rug Ya Carpet Bichana

Ek carpet ya rug ko bed ke neeche ya kamre ke beech mein bichane se kamre ki khoobsurti mein izafa hota hai. Yeh na sirf aap ke pairo ko garmahat ka ehsaas dilata hai balke kamre ki sajawat mein ek naya pan bhi lata hai.

6. Kamre Ki Rozana Safai Karni Chahiye

Ek saaf-suthra aur tarteeb se rakha hua kamra hi khoobsurat lagta hai. Kamre mein safai ka khayal rakhein. Apne bed ko har subah theek karein.

Har cheez ko apni apni jagah par rakhein. Kamre mein cheezein idhar-udhar bikhri hui na hon. Is tarah aap ka kamra khoobsurat lage ga.

7. Bedroom Mein Ghair Zaroori Cheezein

Ghair zaroori cheezon ko kamre mein na rakhein. Is se kamra bhara hua nazar aata hai. Kamre mein jitna kam samaan ho ga, kamra utna hi khula aur saaf-suthra nazar aye ga.

Natija

Halke rang, munasib furniture, theek roshni, munasib parde aur choti choti cheezein mil kar kamre ko ek pur-sukoon jagah bana deti hain. Is ke sath sath rozana safai aur ghair zaroori cheezon se parhez kamre ko khula aur khushgawar rakhta hai.

Yeh wo tamam aasan steps hain jin ko follow kar ke aap apne bedroom ko saja sakti hain.