Washing machine aaj kal har ghar ki zaroori cheez ban chuki hai. Yeh rozmarra ke kaamon ko bohat aasan bana deti hai. Is se khawateen ka waqt bhi bachta hai aur mehnat bhi kaafi kam ho jati hai.

Lekin agar washing machine ka sahi tareeqe se istemal na kiya jaye aur safai ka khayal na rakha jaye to yeh sehat ke liye nuqsan ka sabab bhi ban sakti hai.

Mahireen Ke Mutabiq

Mahireen ke mutabiq washing machine ke andar bacteria, fungus aur kai doosre nuqsan pohanchane wale jaraseem (germs) jama ho sakte hain jo kapron ke zariye aap ki jild aur sehat par bura asar daalte hain.

Neeche kuch zaroori baatein batai ja rahi hain jo washing machine istemal karne wali har aurat ke liye bohat ahm hain.

1. Geelay Kapray Machine Mein Na Chhorain

Aksar khawateen kapray, dho kar ya spin karne ke baad, raat bhar machine ke andar hi chhor deti hain. Yeh aadat aap ki sehat ke liye theek nahin hai.

Kapron mein pani nikalne ke baad bhi nami rehti hai. Is nami mein bacteria tezi se barhne lagte hain. Agar geelay kapray band machine ke andar paray rahein to jaraseem aur zyada phail jate hain.

Is liye koshish karein ke kapron ko dhone ke baad foran machine se nikaal kar sukha lein.

2. Washing Machine Ka Dhakan Foran Band Na Karein

Kapray nikaalne ke baad zyada tar khawateen washing machine ka dhakan (lid) ya door foran band kar deti hain. Yeh bhi galat tarika hai.

Jab washing machine geeli ho aur usay band kar diya jaye to fungus aur bacteria ko barhne ka moka mil jata hai.

Behtar yeh hai ke wash ke baad machine ka dhakan kuch dair ke liye khula chhor dein taake andar ki nami khatam ho jaye.

3. Mozay Doosre Kapron Se Alag Dhona Zyada Behtar Hai

Kya aap janti hain keh mozon (socks) mein sab se zyada germs aur badboo paida karne wale bacteria hote hain. Agar in ko washing machine mein doosre kapron ke sath dhoya jaye to baqi kapron mein bhi jaraseem phail sakte hain.

Behtar tarika yeh hai keh mozay alag se ya hath se dhoye jayein. Khaas tor par bachon aur bemar afrad ke mozay.

4. Bed Sheets Ko Garam Pani Se Dhona Chahiye

Bed sheets par rozana istemal ki wajah se paseena, dhool mitti aur germs jama ho jate hain. Sirf normal pani se dhone se kabhi kabhi bed sheets poori tarah saaf nahin hotin aur zard rang ke daagh bhi reh jate hain.

Bed sheets ko garam pani se dhona zyada behtar hota hai. Garam pani bacteria aur fungus ko khatam karne mein madad karta hai aur chadrein zyada saaf hoti hain.

5. Washing Machine Ki Mahana Safai Zaroori Hai

Sirf kapray saaf karna hi kaafi nahin, washing machine ki safai bhi utni hi zaroori hai. Mahine mein kam-az-kam ek baar machine ko khali chala kar us mein garam pani ke sath safed sirka (white vinegar) ya baking soda daal kar chakar (cycle) mukammal karein. Is se washing machine ke andar ki badboo aur bacteria kam ho jate hain.

6. Filter Ki Safai Ko Nazar Andaz Na Karein

Washing machine ka filter aksar nazar andaz ho jata hai. Jab ke yahan kapron ke reshay, baal aur gandagi waghera jama hoti rehti hai. Agar filter saaf na kiya jaye to pani ka nizaam mutasir hota hai aur germs paida hote hain.

Har mahine filter nikaal kar saaf karna washing machine ki sehat aur safai dono ke liye zaroori hai.

7. Zyada Detergent Ka Istemal Nahin Karna Chahiye

Zyada sabun ya detergent daalne se zyada safai nahin hoti. Balkeh is se kapron mein chemical ke zarraat reh jate hain jo baad mein jild ki kharish aur allergy ka sabab ban sakte hain. Hamesha munasib miqdaar mein detergent ya sabun istemal karein.

Natija

Washing machine khawateen ki zindagi ko aasan bana deti hai. Lekin sirf tab jab is ka istemal sahi tareeqe se kiya jata hai. Choti choti ehtiyati tadabeer, jaise geelay kapray foran nikaalna, machine ko hawa lagne dena, filter saaf rakhna aur mahana safai karna, aap ke ghar ko zyada sehatmand bana sakti hain.

In choti choti aadaton se na sirf aap ke kapron ki safai behtar hoti hai balkay aap ki family ki sehat ki bhi hifazat hoti hai. Is ke sath sath in asaan aadaton ko apna kar aap washing machine ko zyada arsay tak behtar halat mein rakh sakti hain.